2015 թվականի կեսերին Apple-ը դադարեցնելու է iPhone 5C սմարթֆոնի արտադրությունը:
Պլաստիկե բազմերանգ պատյանով iPhone 5C մոդելը թողարկվել է 2013 թվականի աշնանը: Սմարթֆոնի նպատակն էր փոխարինել iPhone 5-ին, ինչպես նաեւ լրացնել անցյալ տարվա եւս մեկ նորույթի՝ iPhone 5S-ին: Այս տարի, iPhone 6-ի եւ iPhone 6 Plus-ի թողարկումից հետո, ընկերությունն iPhone 5C-ը թողեց շուկայում, սակայն ավելի իջեցրեց դրա գինը:
Ըստ MacRumors-ի, դեռեւս հայտնի չէ, թե երբ է դադարեցվելու այդ սմարթֆոնի վաճառքը, բայց հավանական է, որ դա տեղի կունենա 2015 թվականի աշնանը, հաջորդ սերնդի iPhone-ի մասին հայտարարելուց հետո:
Ավելի վաղ մի շարք լրատվամիջոցներ հաղորդել էին, որ iPhone 5C-ի պահանջարկի հետ կապված Apple-ը սկսեց խնդիրներ ունենալ անցյալ տարի, iPhone 5S-ի մեծ տարածում գտնելուց հետո: Վաճառքը խթանելու համար Apple-ը ստիպված եղավ գովազդային մեծ արշավ թողարկել: