«Հարսնաքարի» գործով դատապարտված Գարիկ Մարգարյանի մայրը չի կարեւորում, թե դատարանի նկատմամբ անհարգալից վերաբերմունք ցուցաբերելու համար ինչ պատիժ կսահմանի դատարանը Գարիկ Մարգարյանի եւ Նորայր Հայրապետյանի նկատմամբ:
Նունե Մարգարյաին մտահոգում է այն, որ ՎՃռաբեկ դատարանը մերժել է վարույթ ընդունել «Հարսնաքարի» գործով դատապարտյալների բողոքը եւ որ իր որդին դեռ 10 տարի պետք է ազատազրկված մնա: Այս մասին NEWS.am-ի հետ զրույցում ասաց Գարիկ Մարգարյանի մայրը՝ Նունե Մարգարյանը։
«Ես նշանակություն չեմ տալիս՝ 1 ամիս կտան, թե 2ամիս, փինաչի Դավիթ Հարությունյանը արդեն դատապարտել է: Իրան դատավոր չեմ համարում, իրա արած դատը փինաչու դատ էր, 12 տարի դատապարտեց: Ինքը դատավոր աշխատելու իրավունք չունի»,- ասաց դատապարտյալի մայրը:
Նունե Մարգարյանը անիծում է այն օրը, երբ իր որդին «Հարսնաքար» ռեստորանային համալիրում աշխատանքի անցավ.«Սեւ լիներ էն օրը , որ տղես գնաց «Հարսնաքարում» աշխատելու, իմ երեխու ոտքը կոտրվեր չգնար այնտեղ աշխատելու»:
Նունե Մարգարյանի խոսքով՝ իրենց հաջորդ քայլը Եվրոպական դատարան դիմելն է։
Հիշեցնենք, որ դատախազ Նարեկ Թոփուզյանը դատարանի նկատմամբ անհարգալից վերաբերմունք ցուցաբերելու՝ փաստաբան Տիգրան Եգորյանի հասցեին սեռական բնույթի հայհոյանքներ հնչեցնելու համար պահանջել է մեկ ամսվա կալանք սահմանել «Հարսնաքարի» գործով 12-ական տարվա ազատազրկման դատապարտված Գարիկ Մարգարյանի եւ Նորայր Հայրապետյանի նկատմամբ։
Ավելի վաղ NEWS.am-ը հայտնել էր, որ 2012թ. հունիսի 17-ին, ժամը 23:00-ի սահմաններում, այդ ժամանակ ՀՀԿ խմբակցության պատգամավոր, ՀՀ ֆուտբոլի ֆեդերացիայի նախագահ Ռուբեն Հայրապետյանին պատկանող «Հարսնաքար» համալիրում դաժանորեն ծեծի էին ենթարկվել մի քանի ռազմական բժիշկներ: Նրանցից մեկը՝ Վահե Ավետյանը, հունիսի 29-ին վախճանվել էր հիվանդանոցում՝ առանց գիտակցության գալու: Հարուցված քրգործով ամբաստանյալներ Արման Խաչատրյանին, Նորայր Հայրապետյանին, Գարիկ Մարգարյանին, Արման Բաղդասարյանին, Դավիթ Ադամյանին եւ Արթուր Բաբլոյանին առաջին ատյանի դատարանը մարտի 24-ին դատապարտեց 12-ական տարվա ազատազրկման։ Ամբաստանյալներն առաջին ատյանի դատարանի որոշումը փորձեցին բեկանել Վերաքննիչ քրեական դատարանում, սակայն դատարանն առաջին ատյանի որոշումն անփոփոխ թողեց։ Ամբաստանյալների պաշտպանները դիմեցին Վճռաբեկ դատարան, սակայն դատարանը գործը վարույթ չընդունեց։
