Դեկտեմբերի 4-ին Վրաստանում Հայաստանի դեսպան Յուրի Վարդանյանը այցելել է Ջավախք, որտեղ մի շարք հանդիպումներ է անցկացրել Ախալքալաքի եւ Նինոծմինդայի շրջանների ղեկավարների, երկու շրջանների հոգեւոր առաջնորդների, ինչպես նաեւ բնակչության հետ։

Ախալքալաքում դեսպանին դիմավորել են Սուրբ Խաչ եկեղեցու բակում՝ աղուհացով եւ հայկական երաժշտության ուղեկցությամբ։

Նախկին ծանրորդ, աշխարհի բազմակի չեմպիոն եւ ռեկորդակիր Յուրի Վարդանյանը Վրաստանի արտակարգ եւ լիազոր դեսպան է նշանակվել 5 ամիս առաջ։ Նա այս պաշտոնում փոխարինել է Հովհաննես Մանուկյանին, ով ներկայումս Հայաստանի արդարադատության նախարարն է։

Իշխանությունների եւ բնակչության ներկայացուցիչների հետ հանդիպման ընթացքում հիմնականում քննարկվել են Վրաստանի նոր միգրացիոն օրենքի հետ կապված հարցեր, ինչպես նաեւ Հայաստանի  հետ սահմանին մաքսային կարգավորումների վերաբերյալ խնդիրները, որոնք դժվարություններ են ստեղծում տեղի բնակչության համար։