Դրամի արժեզրկումը ազդել է ՀՀ բոլոր քաղաքացիների վրա: Այս մասին NEWS.am-ի թղթակցի հետ զրույցում ասաց ԱԺ նախկին պատգամավոր, այժմ գործարարությամբ զբաղվող Խաչիկ Հարությունյանը:
Թեեւ նա դոլարով վարկեր չունի եւ բիզնեսն էլ այնքան մեծ չէ, որ վնասներ կրի, բայց նշեց, որ փոխարժեքի տատանումները ազդում են գների վրա, ինչն էլ հարվածում է ամեն մի ՀՀ քաղաքացու գրպանին:
«Կառավարությունը, ԿԲ-ն պետք է գործուն միջոցներ ձեռնարկեն, որ դրամի փլուզումը չշարունակվի, չբերի սոցիալական լուրջ ցնցումների, պետք է գործի դնեն ողջ գործիքակազմը, ուսումնասիրեն Ռուսաստանի օրինակը, տեսնեն՝ ինչ է կատարվում այնտեղ».-ասաց նախկին պատգամավոր:
Իսկ թե ինչ պատճառներ են ընկած այս ամենի հիմքում, Խաչիկ Հարությունյանն ասաց, որ ըստ վերլուծաբանների՝ միջակ երկրներում նման պրոցեսներ լինում են, պատճառները մի քանիսն են՝ նավթի գներ, արեւմտյան սանկցիաները Ռուսաստանի նկատմամբ, ընդհանուր տնտեսական, քաղաքական պրոբլեմները:
