Ավստրիայում ՀՀ դեսպանությանը կից գործող «Հայաստան» կենտրոնում, դեկտեմբերի 17-ին, տեղի է ունեցել ընդունելություն Վիեննայում լույս տեսնող «Cercle diplomatique et économique international» ամսագրի` Հայաստանին նվիրված համարի կապակցությամբ:
ԱԳՆ մամուլի ծառայությունից հայտնում են, որ միջոցառմանը ներկա էին Ավստրիայի գիտության, հետազոտությունների եւ տնտեսության նախարարի տեղակալ, արտաքին առեւտրի եւ եվրոպական ինտեգրացիայի բաժանմունքի վարիչ, Հայ-ավստրիական առեւտրատնտեսական եւ գիտատեխնիկական հանձնաժողի ավստրիական կողմի համանախագահ Բեռնադետ Գիռլինգերը, Ավստրիայի կառավարության բարձրաստիճան պաշտոնյաներ, Հայաստանի հետ համագործակցող ավստրիական գործարար շրջանների ներկայացուցիչներ, դեսպաններ, հայազգի գործարարներ, լրագրողներ:
Համարում զետեղված են Հայաստան-Ավստրիա երկկողմ հարաբերությունների վերաբերյալ Ավստրիայում ՀՀ դեսպան Արման Կիրակոսյանի հետ ընդարձակ հարցազրույցը, 2014թ. հունիսի 10-12-ը Ավստրիա կատարած պաշտոնական այցի ընթացքում ՀՀ նախագահ Սերժ Սարգսյանի հունիսի 12-ի ելույթը Ավստրիայի առեւտրատնտեսական պալատում՝ նվիրված հայ-ավստրիական առեւտրատնտեսական հարաբերություններին: Ամսագրի կազմին պատկերված է Երեւանի Օպերայի եւ բալետի ակադեմիական թատրոնի շենքի շքեղ լուսանկարը:
Ելույթով հանդես եկան Ավստրիայում ՀՀ դեսպան Արման Կիրակոսյանը եւ ամսագրի հրատարակիչ եւ գլխավոր խմբագիր Վալթրաուդ Շթայնբյոքը:
