ՆԱՏՕ-ի շտաբ-բնակարանի ներկայացուցիչը Ռուսաստանի նախագահ Վլադիմիր Պուտինի հայտարարությունը ոչ այնքան կոռեկտ է անվանել: Նա հայտարարել է, որ ռազմավարական թռիչքների սահմանափակման մասին Պուտինի խոսքերը «չեն արտացոլում իրերի իրական դրությունը»:
«Երբ այդ վտանգի մասին ասացին Շվեդիայի եւ Դանիայի պաշտպանության նախարարները, Ռուսաստանը, չգիտես ինչու, ընկալեց դա որպես նման թռիչքները սահմանափակելու փորձ, բայց դա այդպես չէ: Պարզապես պետք է անել ամեն ինչ՝ վտանգավոր իրավիճակներ չստեղծելու համար»,-ասել է ՆԱՏՕ-ի ներկայացուցիչը, հաղորդում է Gazeta-ն:
ԽՍՀՄ փլուզումից հետո ՆԱՏՕ-ի՝ դեպի արեւելք ընդլայնման առթիվ Դաշինքի ներկայացուցիչը նշել է, որ դա արվել է Վարշավայի պայմանագրի նախկին անդամ երկրների անվտանգությունն ապահովելու համար եւ ուղղված չի եղել Ռուսաստանի դեմ:
«Ավելի քան 20 տարի ՆԱՏՕ-ն ձգտել է գործընկերություն հաստատել Ռուսաստանի հետ: ՆԱՏՕ-ի դաշնակիցները հակամարտություն չեն փնտրում Ռուսաստանի հետ եւ ՆԱՏՕ-ն սպառնալիք չէ Մոսկվայի համար: Բայց մենք չենք կարող փոխել ՆԱՏՕ-ի սկզբունքները, որոնք կայանում են նրանում, որ ցանկացած երկիր կարող է ընտրել, թե որ միությունում ընդգրկվի՝ ՆԱՏՕ-ում, թե ՀԱՊԿ-ում: Այդ առումով, մենք չենք կարող որեւէ մեկին դրանում սահմանափակել»,-ընդգծել է Դաշինքի ներկայացուցիչը:
Հիշեցնենք, որ մեծ մամուլի ասուլիսի ժամանակ Վլադիմիր Պուտինը հայտարարել է, որ Ռուսաստանը ոչ մեկի վրա չի հարձակվում: «Մե՞նք ենք մեր զինված ուժերը մոտեցնում ԱՄՆ-ի կամ մեկ այլ երկրի սահմաններին: ՆԱՏՕ-ի ռազմակայանները, ռազմական ենթակառուցվածքները ո՞վ է մոտեցնում մեզ»,-ասել է Պուտինը:
