Նախագահ Սերժ Սարգսյանն այսօր՝ հունվարի 7-ին, Ֆրանսիայի նախագահ Ֆրանսուա Օլանդին ցավակցական հեռագիր է հղել Փարիզում «Charlie Hebdo» ամսագրի խմբագրության նկատմամբ իրականացված ահաբեկչության կապակցությամբ, որը տասներկու անմեղ մարդկային զոհերի եւ մի շարք վիրավորների պատճառ է դարձել: Այս մասին տեղեկանում ենք Հայաստանի նախագահի պաշտոնական կայքից:
«Խստորեն դատապարտում ենք ահաբեկչությունն իր բոլոր դրսեւորումներով եւ վերահաստատում մեր հանձնառությունը՝ հետեւողականորեն շարունակելու պայքարը միջազգային ահաբեկչության դեմ:
Վշտի ու կորստի այս ծանր պահին Հայաստանն ու հայ ժողովուրդը Ձեզ հետ են, ֆրանսիացի բարեկամ ժողովրդի կողքին։ Մեր անկեղծ զորակցությունն ու աջակցությունն ենք հայտնում զոհվածների հարազատներին եւ մերձավորներին՝ մաղթելով նրանց տոկունություն եւ ոգու արիություն, իսկ վիրավորներին՝ արագ ապաքինում:
Ընդունեք, խնդրեմ, Ձերդ Գերազանցություն, խորին հարգանքներիս հավաստիքը»,- ասված է Հայաստանի նախագահի ցավակցական հեռագրում: