Գյումրիում հունվարի 15-ին տեղի ունեցած բախումները «ահագին տհաճ երեւույթ էին» Հայաստանի երկրորդ քաղաքի համար: NEWS.am-ի թղթակցի հետ զրույցում ոստիկանների եւ ցուցարարների միջեւ տեղի ունեցած բախումներն այսպես մեկնաբանեց Շիրակի մարզպետ Ֆելիքս Ցոլակյանը:
«Նման սցենար պետք չէ ունենար, պետք չէր որ այդպիսի բան կատարվեր, սա ահագին տհաճ երեւույթ էր մեր քաղաքի համար: Իրավական մասով դատախազությունը պատասխանել է եւ միայն իրավաբանները կարող են պարզաբանում տալ, հիմնավորումներ տալ, թե ինչքանով է գյումրեցիները պահանջն իրավական: Գլխավոր դատախազն ինքն էլ է ասել, որ մեղավորը խիստ պատիժ կստանա, ինքս էլ եմ դրանում համոզված»,- ասաց մարզպետը:
Նրա խոսքով՝ այս պահին Գյումրիում հանգիստ է, լարվածություն չկա:
Ավելի վաղ NEWS.am-ը հայտնել էր, որ հունվարի 12-ին Գյումրիի Մյասնիկյան փողոցի տներից մեկում հրազենային վնասվածքներից սպանված են գտել Ավետիսյանների ընտանիքի 6 անդամներին, այդ թվում՝ մեկուկես տարեկան դուստրը: Վեց ամսական Սերյոժա Ավետիսյանը վնասվածքներ էր ստացել եւ տեղափոխվել է հիվանդանոց: Նրա վիճակը կայուն ծանր է:
Կասկածյալը՝ ռուս զինվորական Վալերի Պավելի Պերմյակովը ձերբակալվել է նույն օրը կեսգիշերին մոտ, ըստ պաշտոնական տվյալների՝ հայ-թուրքական սահմանի մոտ: Ներկայումս նա գտնվում է ռուսական ռազմակայանում: Նրան կալանավորել են եւ մեղադրանք են առաջադրել Ռուսաստանի Դաշնության Քրեական օրենսգրքի 105-րդ հոդվածի 2-րդ (երկուսից ավելի մարդկանց սպանություն) եւ 338-րդ հոդվածի 2-րդ մասի (դասալքություն՝ ծառայողական զենքով): Սպանության փաստով քրգործ է հարուցվել նաեւ ՀՀ Քննչական կոմիտեում:
ՀՀ գլխավոր դատախազության մեկնաբանմամբ, նա գտնվում է ՌԴ իրավազորության ներքո եւ դատվելու է ռուսական օրենսդրությամբ: Այս որոշումը հանրային բողոքի լայն ալիք է բարձրացրել, վերջին օրերին բողոքի ակցիաներ եւ մոմավառություններ են եղել Երեւանում, Գյումրիում, այլ քաղաքներում:
