Հայաստանի գլխավոր դատախազ Գեւորգ Կոստանյանի հայրը ՝ Շենգավիթ վարչական շրջանի ընդհանուր իրավասության առաջին ատյանի դատարանի նախագահ Սուրիկ Կոստանյանը կանցնի դիվանագիտական աշխատանքի: Այս մասին հայտնեցին NEWS.am-ի աղբյուրները:
Մեր տեղեկություններով՝ Սուրիկ Կոստանյանը նշանակվելու է Դոնի Ռոստովում ՀՀ հյուպատոս:
Նշենք, որ Ռուսաստանի Հարավային դաշնային տարածաշրջանում 2003թ.-ից ՀՀ գլխավոր հյուպատոս է Արարատ Գոմցյանը:
Ավելի վաղ NEWS.am-ը հայտնել էր, որ հունվարի 12-ին, Արդարադատության խորհուրդը քննարկել է Երևան քաղաքի Շենգավիթ վարչական շրջանի ընդհանուր իրավասության առաջին ատյանի դատարանի նախագահ Սուրիկ Կոստանյանի` իր լիազորությունները դադարեցնելու վերաբերյալ դիմումը, ըստ որի` Սուրիկ Կոստանյանը դատավորի պաշտոնավարմանը խոչընդոտող հիվանդություն է ձեռք բերել: Սուրիկ Կոստանյանի լիազորությունները դադարեցվել են ՀՀ Նախագահի 16.01.2015թ. հրամանագրով:
