![](img/news/25/44/45/default.jpg)
«Բարգավաճ Հայաստան» կուսակցությունը մինչեւ համագումարն ամենայն հավանականությամբ ոչ մի հայտարարություն չի անի: Այս մասին NEWS.am-ին ասաց ԱԺ ԲՀԿ խմբակցության պատգամավոր Ստեփան Մարգարյանը:
Հարցին, թե մինչեւ մարտի 5-ը ԲՀԿ-ն որեւէ բան կհայտարարի՞ կուսակցության նոր առաջնորդի մասին, Ստեփան Մարգարյանը պատասխանեց. «Թող համագումարը որոշի էլի, որեւէ բան չի լինի մինչեւ այդ: Հարցազրույցներ, հայտարարություններ էլ հազիվ թե լինեն, որովհետեւ քննարկումների մեջ ենք»:
Նա հայտնեց, որ համագումարի օրակարգը դեռ հայտնի չէ, սակայն չի բացառվում, որ այն հրապարակվի մինչեւ մարտի 5-ը: Մեր դիտարկմանը, թե խոսակցություններ կան, որ կուսակցության առաջնորդը փոխվելու է եւ տարբեր անուններ են շրջանառվում, Ստեփան Մարգարյանը խնդրեց իրեն հարցեր չտալ.«Դա համագումարի որոշելիքն է, ես հիմա ոչինչ չեմ կարող ասել»:
Նշենք, որ ԲՀԿ-ի 8-րդ արտահերթ համագումարը տեղի կունենա մարտի 5-ին կուսակցության կենտրոնական գրասենյակում: Ըստ շրջանառվող լուրերի՝ համագումարի ընթացքում հնարավոր է քննարկվի ԲՀԿ առաջնորդ Գագիկ Ծառուկյանի հեռանալու եւ կուսակցության նոր առաջնորդ ընտրելու հարցը: