Իշխող կուսակցությունը երբեք դեմ չի եղել ընդդիմության հետ համագործակցությանը: Այս մասին, այսօր՝ փետրվարի 26-ին, ԱԺ-ում լրագրողների հետ զրույցում նշել է ԱԺ նախագահ Գալուստ Սահակյանը:
Նա հիշեցրել է, որ իշխանությունն արդեն առաջարկել է ընդդիմությանը գլխավորել անկախ մարմին. 2013-ին «Ժառանգություն» կուսակցության առաջնորդ Րաֆֆի Հովհաննիսյանը առաջարկ ստացավ ղեկավարել սահմանադրական բարեփոխումների նախապատրաստման հանձնաժողովը:
«Իհարկե, ընդդիմության առջեւ հարց է դրված, որ ավելի շատ լծակներ ստանա իր պլանների իրագործման համար: Իսկ մինչ այդ նրանք պետք է աշխատեն երկրի առջեւ ծառացած խնդիրների լուծման ուղղությամբ, պետք է մասնակցեն այդ աշխատանքներին»,-ասել է Սահակյանը:
Նա նշել է, որ հաջող համագործակցության օրինակներ կան, որոնցից մեկը «Շրջանառության հարկի մասին» օրենքի փոփոխությունները 6 ամսով հետաձգելն էր: «Այդ որոշումն ընդունվել է ոչ այն պատճառով, որ ինչ-որ մեկն ինչ-որ մեկից վախեցել է, այլ որովհետեւ քննարկումներ են եղել եւ փոխըմբռնման են հասել»,-ամփոփել է Գալուստ Սահակյանը:
