Հայտնի դերասան Արտաշես Ալեքսանյանի ( «Մի վախեցիր», «Poker.am», «Գարեգին Նժդեհ», «Ճակատագրի գերիներ», «Դժբախտ երջանկություն», «Վերադարձ», «Ոստիկաններ», «Հարազատ թշնամի» եւ այլն) տունը թալանողները դեռ չեն հայտնաբերվել: Այս մասին NEWS.am-ի թղթակցի հետ զրույցում ասաց Արտաշես Ալեքսանյանը:
Նա հույս էլ չունի, որ գործը կբացահայտվի, առավել եւս՝ գողոնը հայտնաբերվի: «Ամեն մարդ պետք է իր գործի մեջ պրոֆեսինալ լինի, որ վստահություն, հավատ, հույս ներշնչի ժողովրդին: Եթե նման հասարակ գողությունները չեն բացահայտվում, ի՞նչ պրոֆեսիոնալիզմի, հավատի, հույսի, վստահության մասին է խոսքը»,-ասաց դերասանը: Արտաշես Ալեքսանյանը նշեց, որ երբ հետաքրքրվում է գործի մասին, ընդամենը հայտնում են, որ ընթացքի մեջ է: Դեպքից հետո անվտանգության նկատառումներից ելնելով՝ նա մի շարք միջոցառումներ է իրականացրել՝ դուռ, տեսախցիկ է փոխել, տեղադրել եւ այլն, թեեւ չի կարծում, որ գողերը նորից կվերադառնան, բայց եթե վերադառնան էլ, ոչինչ չկա տանելու, ինչպես կատակեց դերասանը, մնում է գազօջախն ու սառնարանը տանեն:
Ավելի վաղ հայտնել էինք, որ Երեւանում թալանել են հայտնի դերասան Արտաշես Ալեքսանյանի ( «Մի վախեցիր», «Poker.am», «Գարեգին Նժդեհ», «Ճակատագրի գերիներ», «Դժբախտ երջանկություն», «Վերադարձ», «Ոստիկաններ», «Հարազատ թշնամի» եւ այլն) բնակարանը: Դերասանը NEWS.am-ի թղթակցի հետ զրույցում պատմել է, որ հունվարի 21-ին տուն գալուց հետո անակնկալի է եկել՝ հայտնաբերելով տան դռները բաց, լույսերը՝ միացված, իսկ բնակարանը՝ թալանված: Հենց նույն օրը՝ երեկոյան, անհայտ անձը կամ անձինք մտել են նրա Նոր Նորքի 9-րդ զանգվածում գտնվող բնակարան եւ տարել ոսկեղեն, հեռուստացույց, ինչպես նաեւ Արտաշես Ալեքսանյանի մեդալները: Դերասանը նշեց, որ մոտավորապես 8-10 հազար դոլարի վնաս են հասցրել: Նրա կարծիքով՝ սա մեկ հոգու ձեռի գործ չէ, քանի որ պետք է մեկը լիներ ներսում, մեկն էլ հետեւեր, որ տուն մարդ չգար:
