Քաղաքական 7 ուժերի համագործակցության մասով առայժմ որեւէ բան չկա եւ վաղ է խոսել արդյունքների մասին: «Ժառանգություն» վարչության փոխնախագահ Արմեն Մարտիրոսյանը NEWS.am-ի թղթակցի հետ զրույցում ասաց, որ այս պահի դրությամբ դեռ միայն քննարկումներ են ընթանում, վաղ է խոսել նոր ընդդիմության ձեւավորման մասին: «Դեռ քննարկումներ են ընթանում, նախնական վիճակ է, հստակ ձեւաչափ, կոնկրետություն չկա, ամեն ինչ ճշտվում է»,-ասաց նա:
Հարցին, թե նոր ձեւավորվելիք ուժը փոխարինո՞ւմ է Եռյակին, Արմեն Մարտիրոսյանը պատասխանեց, որ «փոխարինելու խնդիր չկա, ֆորմատը, խնդիրները ուրիշ են, այստեղ առաջնահերթ մարդու իրավունքների պաշտպանության, անկախության մասին է»:
«Ժողովրդավարական հայրենիք» կուսակցության ղեկավար Պետրոս Մակեյանն էլ NEWS.am-ի թղթակցի հետ զրույցում ասաց, որ ընդամենը հանդիպումներ են եղել, քննարկումները խորհրդատվական բնույթ են կրել տարբեր հարցերի շուրջ: «Պրոցեսները դրական են գնում, թե ինչ հանգրվանի կհասնենք, այս պահին չեմ կարող ասել: Եռյակին փոխարինելու խնդիր դրված չի եղել, հանդիպումները սկսվել են մինչեւ Եռյակի լուծարվելը, դրանից հետո Եռյակը լուծարվել է»,-ասաց Պետրոս Մակեյանը:
«Հիմնադիր խորհրդարանի» անդամ Վարուժան Ավետիսյանն էլ մեզ հետ զրույցում ասաց, որ հանդիպումներ, քննարկումներ են եղել, առայժմ որեւէ արդյունք չկա: «Ընդամենը առաջարկություն է եղել հանդիպելու եւ որոշ հարցեր քննարկելու, կոնկրետ բան չկա»,-ասաց նա:
Ի դեպ, այսօր՝ փետրվարի 27-ին, ժամը 16.00-ին, Ազատության հրապարակում նախատեսված է «Ժառանգության» առաջնորդ Րաֆֆի Հովհաննիսյանի ասուլիս-հանդիպումը: Նախատեսվում է, որ Ազատության հրապարակում կլինեն նաեւ համագործակցող ուժերի ներկայացուցիչներ, իսկ հանրահավաքից հետո նախատեսված է նրանց խորհրդակցությունը:
Նշենք, որ «Հայկական ժամանակը» գրել էր, որ արտախորհրդարանական մի շարք ուժեր այս օրերին ակտիվ քաղաքական քննարկումների եւ խորհրդակցությունների մեջ են: Հանդիպումների կազմակերպիչը ԱԻՄ նախագահ Պարույր Հայրիկյանն է: Հայրիկյանը մեզ հետ զրույցում հաստատելով քննարկումների անցկացման լուրը, ասել է, որ 7 ուժեր համատեղ հանդիպումներ են անցկացնում, ապա հայտարարել է, որ այդ 7 ուժերն են՝ ԱԻՄ-ը, «Ժառանգությունը», ՀՀՇ-ն, «Ազատ դեմոկրատները», Հիմնադիր խորհրդարանը, Պահպանողական եւ «Ժողովրդավարական Հայրենիք» կուսակցությունները: