«Բարգավաճ Հայաստանի» արտահերթ համագումարը կարող է ընդդիմության շարքերում վերադասավորումներ առաջ բերել։ Այս մասին փետրվարի 26-ին խորհրդարանական ճեպազրույցի ժամանակ հայտարարեց ԱԺ «Ժառանգություն» խմբակցության ղեկավար Ռուբեն Հակոբյանը։
«Ժառանգությունը» մարտի 5-ի համագումարին մասնակցելու հրավեր դեռ չի ստացել եւ չգիտի, կմասնակցե՞ն արդյոք համագումարին քաղաքական մյուս ուժերի ներկայացուցիչները։ «Սակայն կարծում եմ, որ համագումարը հստակություն կմտցնի ոչ միայն ԲՀԿ դիրքորոշման մեջ։ Ընդդիմության շարքերում ընդհանուր առմամբ վերադասավորումներ տեղի կունենան»,- ասաց Հակոբյանը։
Հարցին, թե ինչ փոփոխություններ կարող են լինել դրանք, Հակոբյանը պատասխանեց. «Իշխանության մեքենայի դեմ հակակշիռ ուժ է պետք, իսկ միայնակ դա չի կարող ստեղծել ոչ մի քաղաքական ուժ, հատկապես եթե այդ մեքենան աշխատում է ճնշումների լեզվով»։
