![](img/news/25/49/39/default.jpg)
Ընդդիմադիր գործիչ Բորիս Նեմցովը ծրագրում էր հրապարակել Դոնբասում ռուսաստանցի զինվորականների ներկայության համոզիչ ապացույցներ։ Այդ մասին «112 Ուկրաինա» հեռուստաալիքի եթերում հայտարարել է երկրի նախագահ Պյոտր Պորոշենկոն՝ հավելելով, որ Նեմցովի հետ խոսել է մի քանի օր առաջ, հաղորդում է RBC-ն։
«Ինչ-որ մեկը դրանից խիստ վախենում էր։ Բորիսը չէր վախենում, իսկ դահիճները վախենում էին։ Նրանք էլ սպանեցին»,- ասել է Պորոշենկոն։ Նա Նեմցովին Ուկրաինայի մեծ բարեկամ եւ Ռուսաստանի իրականա հայրենասեր է անվանել։
«Մարտի 1-ին նա պետք է գլխավորեր բազմահազարանոց հանրահավաքը՝ ցույց տալու, որ կա այլ Ռուսաստան, որը սիրում է Ուկրաինան, հարգում է մարդու իրավունքները, որի համար ազատությունը դատարկ հնչյուն չէ։ Եւ հանուն ժողովրդավարության եւ ազատության նա պատրաստ էր զոհելու իր կյանքը»,- նշել է Պորոշենկոն։
Ի դեպ, սպանության գիշերը ընդդիմադիր Իլյա Յաշինը պատմել էր, թե Նեմցովն աշխատում է «Պուտին. Պատերազմ» զեկույցի վրա։
Նշենք, որ Բորիս Նեմցովը սպանվել էր փետրվարի 27-ի երեկոյան, Մոսկվայի կենտրոնում։ Սպանության փաստով քրգործ է հարուցվել։