Բաքուն եւս մեկ անգամ ի ցույց է դնում իր արհամարհանքը միջնորդների առաջարկությունների հանդեպ։ Այս մասին նշել է Հայաստանի ԱԳ նախարար Էդվարդ Նալբանդյանը՝ պատասխանելով Aravot.am-ի հարցին, թե ինչպե՞ս կմեկնաբանի իրավիճակի սրումը սահմանագծին։

Իր պատասխանում ԱԳ նախարարը նշել է.

«Վերջին օրերին Ադրբեջանի զինված ուժերի սադրանքների հետեւանքով կրկին լարվել է իրավիճակը հայ-ադրբեջանական սահմանին եւ Ադրբեջան-Արցախ շփման գծում, որը հանգեցրել է մարդկային զոհերի։

Ադրբեջանական կողմը հերթական անգամ ցույց տվեց, թե ինչպես է վերաբերվում ԵԱՀԿ Մինսկի խմբի համանախագահների հասցեական կոչերին՝ խստորեն հետեւելու հրադադարի պահպանմանը եւ զերծ մնալու իրավիճակը սրող քայլերից։

Մինսկի խմբի համանախագահները տարածաշրջան վերջին այցելության արդյունքներով հրապարակված հայտարարության մեջ նշել էին, որ նախագահները համաձայնել են քննարկել զինադադարի ամրապնդմանն ուղղված եռանախագահների առաջարկները։ Վերոհիշյալ սադրանքներով Բաքուն եւս մեկ անգամ ի ցույց է դնում իր արհամարհանքը միջնորդների առաջարկությունների հանդեպ»: