Հայ ազգային կոնգրեսը նկատում է շրջանառության հարկի մասին օրենքի փոփոխությունների նոր խմբագրմամբ նախագծի առավելությունները, բայց չի կարող պաշտպանել այն: Այս մասին այսօր՝ մարտի 4-ին, ԱԺ-ում հայտարարել է ՀԱԿ խմբակցության ղեկավար Լեւոն Զուրաբյանը:

Նրա խոսքով՝ կառավարությունը բավական ճկուն տարբերակ է առաջարկել, որն ընդունելի է մեծամասնության համար, բայց կա մի «բայց». Առեւտրականների ինչ-որ հատվածի համար հարկի դրույքաչափը բարձրացել է 3,5-ից հանսելով 5 տոկոսի, որքան լ ընդգծենք 4 տոկոսով վերահաշվարկի հնարավորությունը:

«Բոլոր դեպքերում առեւտրականների ինչ-որ հատվածի համար հարկը մեծացել է, ուստի մենք չենք կարող կողմ քվեարկել»,-ասել է Զուրաբյանը:

«Ժառանգություն» խմբակցության ղեկավար Ռուբեն Հակոբյանն էլ նշել է, որ օրինագիծը չի առաջարկում կոռուպցիայի դեմ պայքարի վճռական քայլեր, որը պահպանվում է ՓՄՁ-ի դեմ իրավակիրառ պրակտիկայում:

«Շրջանառության հարկի մասին» օրենքում փոփոխությունների նախագծով առաջարկվում է առանց թղթաբանության գործելու դեպքում շրջանառության հարկը սահմանել 5 տոկոս: Եթե նախկինում առեւտրի սուբյեկտների համար շրջանառությունից հարկը կազմում էր 1%՝ գործարքների պարտադիր փաստաթղթավորմամբ, ապա հիմա դրույքաչափը 1,5% է՝ փաստաթղթավորված ապրանքների համար եւ 5%՝ «ստվերային»: Այդուհանդերձ, ընդհանուր շրջանառությունից հարկը չի կարող 1,5 տոկոսից ցածր լինել: Արտադրող սուբյեկտներից հարկը մնում է հինը՝ 3,5 տոկոս:

Շրջանառության հարկի համար առավելագույն շեմը առաջարկվում է տարեկան 58,35 մլն դրամից հասցնել 113,4 մլն դրամի: Այդ շեմն անցնելու դեպքում ԱԱՀ-ով հարկվում է միայն ավելացած մասը: