Համագումարները նրա համար են, որ կայացվեն որոշումներ: Այս մասին NEWS.am-ի թղթակցի հետ զրույցում ասաց ԲՀԿ խմբակցության քարտուղար Նաիրա Զոհրաբյանը:
«Այս պահին, կարծում եմ, Ծառուկյանի փոխարեն որեւէ մեկը չի կարող որոշել եւ ասել, թե համագումարում ինչ է անելու եւ ինչ է ասելու Գագիկ Ծառուկյանը: Ինչ վերաբերում է նախագահի թեկնածուին, շատ շնորհակալ եմ իմ գործընկեր Միքայել Մելքումյանին իմ հնարավոր թեկնածությանը հավանություն տալու համար, բայց դա եւս որոշելու է համագումարը: Այս պահին, չեմ կարծում, իմաստ ունի խոսել համագումարում կայացվելիք հնարավոր որոշումների մասին: ԲՀԿ-ն ունի նախագահ՝ Գագիկ Ծառուկյանն է եւ նրա փոխարեն որոշել՝ տալու է հրաժարական, թե ինչ է լինելու: Կարծում եմ՝ ճիշտ կլինի թույլ տալ նա իր անելիքը կամ ասելիքը որոշի, նույնը վերաբերում է Օսկանյանին, ինքը պետք է որոշի՝ պահում է մանդտաը, չի պահում, մնում է, չի մնում»,-ասաց Նաիրա Զոհրաբյանը:
Ավելի վաղ Միքայել Մելքումյանն հայտարարել է, թե ԲՀԿ առաջնորդ Գագիկ Ծառուկյանը կհրաժարվի կուսակցության ղեկավարի պաշտոնից, կուսակցությունը ղեկավարելու է ԲՀԿ խմբակցության քարտուղար Նաիրա Զոհրաբյանը: Նա նաեւ ասել է, թե ՀՀ նախկին արտգործնախարար, ԲՀԿ-ական պատգամավոր Վարդան Օսկանյանը կլքի ԲՀԿ-ն:
