Նուբարաշենում սպանված երրորդ անձի ազգանունը Նազարյանց է. Քննչական կոմիտե (ֆոտո)

Երեւանի Նուբարաշեն վարչական շրջանում այսօր՝ մարտի 4-ին, հնչած կրակոցների հետեւանքով մահացած երրորդ անձը Մեսրոպ Նազարյանցն է։ Այս մասին հաղորդում է ՀՀ Քննչական կոմիտեն։ Նշենք, որ ավելի վաղ ոստիկանությունը հաղորդել էր, որ նրա ազգանունը Մելիքյան է, ինչը լրատվամիջոցներին հիմք էր տվել ենթադրելու, որ նա «Օշականցի Գեւորիկի» եղբորորդին է։ Հիշեցնենք, որ, ըստ հրապարակումների, մոտ մեկ տարի առաջ լարվել էին «Օշականցի Գեւորիկի» եւ այսօրվա կրակոցների հետեւանքով սպանված «Երրորդմասցի Լյովիկի» հարաբերությունները։

ՔԿ մամուլի ծառայությունը հաղորդում է, որ կրակոցների հետեւանքով մահացել է երեք անձ՝ Թադեւոսյան Դրաստամատ Հակոբջանի, Ղազարյան Լեւոն Միհրանի, Նազարյանց Մեսրոպ Ալեքսանդրի։

Դեպքի առթիվ ՀՀ քննչական կոմիտեի ՀԿԳ քննության գլխավոր վարչության վարույթում հարուցվել է քրեական գործ՝ ՀՀ քրեական օրենսգրքի 104-րդ հոդվածի 2-րդ մասի 1-ին կետով եւ 235-րդ հոդվածով։ Ստեղծվել է քննչական խումբ, ձեռնարկվում են անհետաձգելի քննչական գործողություններ դեպքի բոլոր հանգամանքները պարզելու, առերեւույթ հանցագործություն կատարած անձի (անձանց) ինքնությունը պարզելու ուղղությամբ։

Դեպքի վայրում է գտնվում օպերատիվ-քննչական խումբը։ Նախաքննության ընթացքի մասին տեղեկատվություն կտրամադրվի լրացուցիչ։

Ավելի վաղ NEWS.am-ը հաղորդել էր, որ կրակոցների հետեւանքով մահացած երեք անձանցից մեկը Լեւոն Ղազարյանն է, որը հայտնի է «Երրորդմասցի Լյովիկ» անունով, մյուսը 35-ամյա Դրաստամատ Թադեւոսյանն է, որը հայտնի է «Դերո» անունով։ Երկուսն էլ մահացել են հիվանդանոցում։ Երրորդ սպանվածը՝ Մեսրոպ Նազարյանը, մահացել է տեղում՝ ՔԿՀ-ի ավտոկայանատեղիում, որտեղ տեղի է ունեցել դեպքը։

Հիշեցնենք, որ ժամը 13։59-ին ոստիկանությունը ահազանգ է ստացել, որ «Նուբարաշեն» ՔԿՀ-ի դիմաց հնչել են կրակոցներ: Դեպքի վայր ժամանած ոստիկանները հայտնաբերել են 1 զոհի եւ 2 վիրավորի, վիրավորներին տեղափոխել են «Էրեբունի» ԲԿ։ Հիվանդանոցից մեզ հայտնեցին, որ 2 երիտասարդներին իրենց մոտ տեղափոխել են արդեն հրազենային վնասվածքներից մահացած վիճակում։ Նախնական տեղեկություններով մի քանի հոգի կրակ են բացել «Նուբարաշեն» ՔԿՀ-ի մոտ եւ փախուստի դիմել։