«Բարգավաճ Հայաստան» կուսակցությունը գաղափարախոսություն չունի, դրական ծրագիր չունի։ Այն ճառերը, որոնք կուսակցության պաշտոնաթող նախագահ Գագիկ Ծառուկյանը ներկայացնում էր իբրեւ ծրագիր, կենացներ են։ Այս մասին մարտի 6-ի մամուլի ասուլիսի ժամանակ հայտարարել է Կովկասի ինստիտուտի տնօրեն քաղաքագետ Ալեքսանդր Իսկանդարյանը։
Նրա խոսքով՝ այնքան էլ հետաքրքիր չէ, թե կամրապնդի իր դիրքերը մի քաղաքական ուժ, որը չի կարող ազդել երկրում ընթացող քաղաքական գործընթացների վրա։ «Ուժը, որը նրա առաջնորդի հետ համաձայնության գալու դեպքում ցրվում է, քաղաքական կուսակցություն չէ։ Թե ինչ կլինի հետագայում, կախված է Հայաստանի իշխող կուսակցությունից։ Եթե հանրապետականները ցանկանան, ԲՀԿ-ն դեռ կշարունակի ինչ-որ կերպ գործել, չեն ցանկանա, չի գործի։ Դա կախված է ԲՀԿ-ից դուրս գտնվող մարդկանց ցանկությունից։ Ինձ՝ որպես անհատի, հետաքրքիր է, պարոն Ծառուկյանին կստիպե՞ն շարունակել ֆինանսավորումը, թե՞ ոչ։ Ի՞նչ տարբերություն անի մարդ կհեռանա։ Ֆինանսական ներհոսքից բացի, այդ կուսակցությանը ուրիշ ոչ մի բան չէր միավորում»,- նշեց քաղաքագետը։
Հիշեցնենք, որ մարտի 5-ին «Բարգավաճ Հայաստան» կուսակցության արտահերթ նիստում կուսակցության առաջնորդ Գագիկ Ծառուկյանը հրաժարվեց իր պաշտոնից եւ հեռացավ ակտիվ քաղաքականությունից։ Կուսակցության քարտուղար ընտրվեց ԲՀԿ խմբակցության քարտուղար Նաիրա Զոհրաբյանը։
