Վերջին ժամանակներս դրամը ԱՄՆ դոլարի հանդեպ ամրացրել է իր դիրքերը (տես գրաֆիկը)։ Թե որքան ժամանակ այդ առաջընթացը կշարունակվի երկրի արժութային շուկայում, պարզ չէ։ Շատ բան կախված է մեր արտահանման դինամիկայից, հաճախ իրականացվող արտաքին տրանսֆերտներից եւ արժույթի հոսքի այլ աղբյուրներից։
Մարտի 30-ի դրությամբ ԱՄՆ դոլարը Հարավային Կովկասում տարեկան հաշվարկով ամրապնդել էր իր դիրքերը ադրբեջանական մանաթի հանդեպ 33.7 տոկոսով, վրացական լարիի հանդեպ 27.3 տոկոսով, իսկ հայկական դրամի հանդեպ 14.1 տոկոսով։ Դոլարը Ռուսաստանում նույն ժամանակահատվածում կայունացրել է իր դիրքերը ավելի քան 1.6 անգամ։
Թեպետ Ռուսաստանում դոլարի փոխարժեքի բարձր ցուցանիշները մնացել են անցյալում, ռուբլու ապագան դեռեւս հարցականի տակ է։ Շատ բան կախված է նավթի գներից, որոնք, չնայած կարճաժամկետ վերելքին, նորից շարունակում են անկում ապրել։
Ինչպես եւ սպասվում էր, Ռուսաստանում ճգնաժամային երեւույթները (այդ թվում՝ ռուբլու փոխարժեքի անկումը) բացասաբար անդրադարձան նաեւ Հայաստանի տնտեսության վրա։ Աշխատանքային միգրանտների մուտքի խնդիրներն ու դրամական փոխանցումները դոլարի վերածելուց հետո ստացած վնասը հանգեցրին «ռուսական» տրանսֆերտների կրճատմանը։
Ռուսաստանում դոլարի կայունացումը նաեւ այլ հետեւանքներ ունեցավ. ներկրված ապրանքները թանկացան, որի հետեւանքով մանրածախ իրացումը դանդաղեց։ NEWS.am-ի հետ զրույցում հայ մասնագետը նշեց, որ կոնյակի մեր արտահանողները, ի վնաս իրենց, փորձում են նվազագույնի հասցնել իրացման գները, քանի որ ռուսական շուկան կորցնելը ուղղակի աղետալի հետեւանքներ կունենա տեղական արտադրողների համար։
Ինչ վերաբերում է մեր աշխատանքային միգրանտներին, ապա Ռուսաստան մուտքի արգելքից բացի, նրանց համար նոր խնդիր առաջացավ։ Համաձայն անկախ ռուս փորձագետների՝ ընթացիկ տարվա ընթացքում երկրում ավտոմեքենաների արտադրության կրճատումից եւ շինարարության տեմպերի անկումից աճել է գործազրկության մակարդակը։ Ինչպես հայտնի է, մեր աշխատանքային միգրանտները հիմնականում զբաղվում էին մանրածախ առեւտրով, այդ թվում՝ շինարարության ոլորտում։
Դրական կարելի է համարել այս տարվա մարտին 500 մլն դոլարի չափով եվրոբոնդերի 2-րդ թողարկման «հաջող տեղաբաշխումը»։ Հիշեցնենք, որ 700 մլն դոլարի չափով հայկական եվրոբոնդերի առաջին թողարկումն իրականացվել էր 2013թ. սեպտեմբերին։ Սակայն, դրա հետ մեկտեղ, աճում են նաեւ պետության արտաքին պարտավորությունները։
