Ապագա խորհրդարանական ընտրությունների արդյունքների վերաբերյալ Գալուստ Սահակյանի կանխատեսումները հուշում են, որ Հայաստանում ընտրություններ չեն անցկացվում, այլ իրականացվում են նախօրոք պլանավորված սցենարով կեղծումներ: NEWS.am-ի թղթակցի հետ զրույցում նման տեսակետ հայտնեց ՀՀՇ վարչության անդամ Վահագն Հայոցյանը: Հարցին, թե խորհրդարանական ընտրություններում ՀՀՇ-ն ավելի շատ քվեներ կստանա առանձի՞ն, թե՞ ՀԱԿ-ի կազմում մասնակցելու դեպքում, Հայոցյանը պատասխանեց. «Մենք ընտրություններին ցանկացած պարագայում մասնակցելու ենք միայն ՀԱԿ-ի կազմում: Առանձին երբեք չենք գնալու»: ՀՀՇ ներկայացուցչի կանխատեսմամբ՝ արդար ընտրությունների դեպքում ՀԱԿ-ը մեծամասնություն է կազմելու ապագա խորհրդարանում, իսկ ՀՀԿ-ն ընդհանրապես տեղ չի ունենա, քանի որ այսօր այդ քաղաքական ուժը բացարձակապես ընտրազանգված չունի:
«ՀՀԿ-ի ընտրազանգվածն այն մարդիկ են, ովքեր այդ կուսակցության անդամ են: Ես չեմ ճանաչում մեկին, որը ցանկանա ձայն տալ ավազակապետության ներկայացուցիչներին»,-նկատեց Հայոցյանը:
Նշենք, որ հուլիսի 28-ին տեղի ունեցած ասուլիսում ՀՀԿ խմբակցության ղեկավար Գալուստ Սահակյանը հայտարարել էր, թե գալիք խորհրդարանական ընտրություններում առաջատարը կրկին լինելու է ՀՀԿ-ն, իսկ ՀՀՇ-ն եւ Հայ ազգային կոնգրեսը խորհրդարան մտնելու հնարավորություն չունեն եւ պետք է շատ աշխատեն այդ ուղղությամբ:
