Հայոց ցեղասպանության զոհերի հիշատակի Ծիծեռնակաբերդ հուշահամալիրում քիչ առաջ ավարտվեց ջահերով ավանդական երթը (ֆոտոռեպորտաժ)։
Հազարավոր երիտասարդներ՝ ջահերով, Հայաստանի եւ Ցեղասպանությունը ճանաչած պետությունների դրոշներով Հանրապետության հրապարակից բարձրացել են Ծիծեռնակաբերդի բարձունք, որտեղ հարգանքի տուրք են մատուցել անմեղ զոհերի հիշատակին։
Երթը տեւել է գրեթե երկուսուկես ժամ, պատճառն այն է, որ այս տարի աննախադեպ թվով անձինք էին մասնակցում երթին թե՛ Հայաստանից, թե՛ Սփյուռքի գաղթօջախներից։ Բազմաթիվ հայորդիներ արտերկրից ժամանել էին Հայաստան՝ հատուկ երթին մասնակցելու համար։
ՀՅԴ պատանեկան միության անդամներն իրենց հետ տարել են ավելի քան 30 մետր երկարությամբ եռագույնը: Երթի կազմակերպիչները 500-ից ավելի ջահ եւ մոտ 10 հազար մոմ էին բաժանել երթի մասնակիցներին։
Հանրապետության հրապարակում երթի մասնակիցներն այրել են Թուրքիայի դրոշը, ապա երթն անցել է Բաղրամյան պողոտայով, Կիեւյան փողոցով և հասել Ծիծեռնակաբերդ:
Նշենք, որ ջահերով երթն այս տարի անցկացվեց ոչ թե ապրիլի 24-ի նախօրեին, այլ հենց ապրիլի 24-ին։