«Հիմնադիր խորհրդարանի» կալանավորված անդամներին եւ մյուս քաղբանտարկյալներին ազատ արձակելու պահանջով ապրիլի 20-ից նստացույց-հացադուլ անող ազատամարտիկ Խաչիկ Ավետիսյանն այսօր՝ ապրիլի 25-ին, ՄԻՊ գրասենյակի մոտ կոչով դիմեց բոլոր սփյուռքահայերին, որպեսզի իրենց մտահոգությունը հայտնեն Հայաստանում քաղբանտարկյալների առկայության առնչությամբ։
«Ես ազատամարտիկ եմ, անցել եմ արցախյան պատերազմի բովով, 3 անգամ վիրավորվել եմ, պարգեւատրվել եմ ԼՂՀ «Մարտական խաչ» շքանշանով, սակայն այսօր իմ բողոքի ձայնն եմ բարձրացրել՝ ընտրելով պայքարի քաղաքակիրթ եղանակը՝ հացադուլը։ Պայքարի պատճառը ավելի շուտ մարդկային է քան քաղաքական։ Կալանավորված են եւ անազատության մեջ են գտնվում հայ ազգի 19 զավակներ, որոնց հանցանքը միայն եւ միայն այլակարծությունն է եւ ներկա իշխանություններին չհանդուրժելը։ Նրանց գերակշիռ մասը արցախյան ազատամարտի մասնակիցներ են, լեգենդար տղաներ։ Մյուս մասը երիտասարդներ են, դաստիարակված մեր ազգի փառապանծ զավակների ոգով։ Հայցում ենք ձեր աջակցությունը, հայրենիքում գտնվելու այս մի քանի ժամերի կամ օրերի ընթացքում օգտագործեք ձեր հնարավորությունը եւ ձեր մտահոգությունը հայտնեք այս խնդրի վերաբերյալ։ Հայրենիքի համար մարտնչած զինվորը այլակարծության համար չպետք է զրկվի ազատությունից»,- հայտարարեց ազատամարտիկը։
Նշենք, որ ազատամարտիկը հույս էր հայտնել, որ այսօր իրեն կմիանան նաեւ մյուս ազատամարտիկները, սակայն նա հացադուլը շարունակում է միայնակ։ Նշենք, որ ազատամարտիկը միայն ապրիլի 20-ին է մնացել ՄԻՊ գրասենյակի մոտ, մինչեւ այսօր հացադուլը, իր խոսքով, արել է տանը։
