![](img/news/26/50/50/default.jpg)
Ես գոհ եմ քվեարկության ընթացքից, ընտրատեղամասերը բացվել են ժամանակին, քաղաքացիներն ակտիվորեն քվեարկում են։ Այս մասին NEWS.am-ի թղթակցի հետ զրույցում նշեց միջազգային դիտորդ, Ընտրական համակարգերի փորձագիտական կենտրոնի ներկայացուցիր Լասլո Քեմենին (Հունգարիա)՝ անդրադառնալով ԼՂՀ 6-րդ գումարման Ազգային ժողովի ընտրություններին։
Նրա խոսքով, երեք տարի առաջ ինքը եղել է ԼՂՀ-ում նախագահական ընտրությունների ժամանակ եւ հետեւել քվեարկության ընթացքին։ «Եվ այն ժամանակ, եւ հիմա ես ոչ մի դիտողություն չունեմ։ Ակնհայտ է, որ նախընտրական արշավը եւ քվեարկության ընթացքը կազմակերպված է բարձր մակարդակով։ ԿԸՀ-ն գիտի իր առջեւ դրված խնդիրը։ Նախապատրաստական աշխատանքը համապատասխանում է միջազգային չափանիշներին»,-ընդգծել է Քեմենին։
Նա նաեւ հայտնել է, որ նախօրեին դիտորդները այցելել են քաղաքական ուժերի նախընտրական շտաբներ, որոնք մասնակցում են քարոզարշավին։ «Բոլորը վստահ էին, որ այսօր տեղի են ունենալու ազատ եւ արդար ընտրություններ»,-ասել է նա։
Հիշեցնենք, որ այսօր՝ մայիսի 3-ին, ԼՂՀ-ում տեղի են ունենում խորհրդարանական ընտրություններ։ ԼՂՀ ԱԺ 33 մանդատների համար պայքարում են համամասնական համակարգով 7 քաղաքական կուսակցություններ՝ «Ազատ հայրենիք» (50 մարդ), «Ազգային վերածնունդ» (14 մարդ), «Արցախի ժողովրդավարական կուսակցություն (35 մարդ), Լեռնային Ղարաբաղի կոմունիստական կուսակցություն (14 մարդ), «Խաղաղություն եւ զարգացում» (6 մարդ), ՀՅԴ (34 մարդ) եւ «Շարժում 88» (14 մարդ):
Մեծամասնական ընտրակարգով առաջադրվել է 50 թեկնածու, որոնցից 27-ը ինքնաառաջադրվածներ են։ Երեք թեկնածու առաջադրել է ՀՅԴ-ն, 4-ական թեկնածուներ՝ «Ազատ Հայրենիքը» եւ Արցախի ժողովրդավարական կուսակցությունը, 5 թեկնածու՝ «Ազգային վերածնունդը», 7 թեկնածու՝ «Շարժում 88»-ը։ Մեծամասնական ընտրակարգով առաջադրվածներից 34-ն անկուսակցական են։
Նշենք, որ ընտրական տեղամասերը կփակվեն երեկոյան ժամը 20.00-ին։