Եվրամիության մասին իր ելույթներում Թուրքիայի  նախագահ Ռեջեփ Թայիփ Էրդողանը պոպուլիզմ է դրսեւորում։ Այս  մասին Polskie Radio 24-ին տված հարցազրույցի ժամանակ հայտարարել է Լեհաստանի միջազգային հարաբերությունների ինստիտուտի թուրքագետ եւ կովկասագետ Կոնրադ Զաշտովտը՝ մեկնաբանելով հունիսի 7-ին Թուրքիայում կայանալիք խորհրդարանական ընտրությունները։

Նրա խոսքով՝ 2000-ական թթ. կեսերին Թուրքիայի՝ ԵՄ-ին անդամակցելու բանակցությունները փակուղի մտան երկու կողմերի մեղքով։ Սակայն դրանից հետո Թուրքիայում սկսեց խորանալ ավտորիտարիզմը։

Էրդողանը ցանկանում է իր ընտրողներին  համոզել, որ ԵՄ-ն Թուրքիային մոտ չի թողնում միայն որովհետեւ այն մուսուլմանական  երկիր է։ «Էրդողանը հաճախ է հակվում դեպի պոպուլիզմը եւ այս դեպքում կրկնում է այն, ինչ մտածում են շարքային թուրքերը։ Մշակութային ու քաղաքակրթական հարցերը մնում են հետին պլանում»,- ասել է Զաշտովտը։