Առաջիկա երկուշաբթի Հայաստանի գլխավոր դատախազը կարող է պահանջել Գորիս քաղաքում ծեծկռտուքի գործը: Այս մասին մայիսի 21-ին լրագրողներին հայտարարեց գլխավոր դատախազ Գեւորգ Կոստանյանը՝ պատասխանելով հարցին, թե ով չի հետեւել Սյունիքի մարզպետի որդուն, որն Ուկրաինա է մեկնել:
Նա նշեց, որ Տիգրան Խաչատրյանին պատրաստվում են գործով որպես վկա ներգրավել: Եթե չներկայանա, նրան բերման ենթարկելու որոշում կկայացվի:
Հարցին, թե ինչո՞ւ է Տիգրան Խաչատրյանը շտապել մեկնել երկրից, եթե ընդամենը վկա է, Կոստանյանը պատասխանեց. «Չեմ ցանկանում ենթադրություններով ղեկավարվել: Վստահ եմ, որ անհրաժեշտ գնահատականները կտա հետաքննությունը: Ենթադրաբար, ես գործը կպահանջեմ երկուշաբթի, այդ ժամանակ էլ կուսումնասիրեմ քննիչների աշխատանքը: Իսկ նրանք գիտեն իրենց անելիքը»:
