«Արեւելյան գործընկերության» ծրագիրը ոչ թե Եվրամիության ընդլայնման, այլ ԵՄ-ին մերձեցման գործիք է: Այս մասին մայիսի 21-ին Ռիգայում «Արեւելյան գործընկերության» գագաթաժողովի մեկնարկից առաջ հայտարարել է Գերմանիայի կանցլեր Անգելա Մերկելը:
Նա հավելել է, որ այսօր երեկոյան բանակցություններն ընթանալու են հենց այդ առանցքի շուրջ: «Արեւելյան գործընկերություն»-ը, ըստ կանցլերի, «անցյալ տարիներին դժվարին ժամանակներ է ունեցել»: ՏԱՍՍ-ի փոխանցմամբ, Մերկելը նաեւ հավելել է, որ ԵՄ-ն խոստովանում է, որ «ծրագրի տարբեր անդամներ բոլորովին տարբեր ուղիով են ընթանում», եւ ԵՄ-ն ընդունում է բոլոր այդ ուղիները:
Դանիայի վարչապետ Հելլե Թորնինգ-Շմիտտն իր հերթին ընդգծել է, որ Եվրամիության արեւելաեվրոպական գործընկեր-երկրները չպետք է հույս ունենան, որ շուտով կարող են կառույցի անդամ դառնալ: «Կարծում եմ՝ նրանց հույսեր տալը ներկայում իրատեսական չէր լինի: Հիմա այդ երկրները պետք է կենտրոնանան սկսած բարեփոխումների շուրջ»,- հավելել է դանիացի գործիչը:
Անդրադառնալով ենթադրություններին, որ ԵՄ-ն արեւելյան գործընկերների հանդեպ ջանքերը նվազեցրել է՝ վախենալով Ռուսաստանից, Թորնինգ-Շմիտտը նշել է. «Ամենեւին: Մենք միշտ հստակ հայտարարել ենք, որ երկրները պետք է բացարձակապես ազատ ընտրեն իրենց գործընկերներին եւ, իհարկե, ԵՄ-ի եւ Ռուսաստանի միջեւ ընտրության մասին խոսք անգամ չկա»:
Ինչ վերաբերում է ԵՄ-ի հետ առանց վիզայի ռեժիմ ստանալու՝ Ուկրաինայի եւ Վրաստանի ձգտմանը, դանիական վարչապետը նկատել է. «Կարեւոր եմ համարում հիշեցնել, որ ազատ վիզային ռեժիմը քաղաքական հարց չէ, այլ տեխնիկական»:
