«Սկոլկովո» նախագիծը հրավիրում է ներդրողների եւ ռեզիդենտների նաեւ Հայաստանից։ Այս մասին NEWS.am-ի թղթակցին հայտարարեց «Սկոլկովո» ռուսական ֆոնդի մամուլի քարտուղար Ալեքսանդրա Բարշեւսկայան։
«Սկոլկովո» տեխոքաղաքի անդամ կարող է դառնալ ինչպես արդեն գործող ընկերությունը, այնպես էլ զրոյից ստեղծված սատարտապը։ Այդուհանդերձ քանի որ ընկերությունների կանոնակարգային փաստաթղթերին մի շարք ֆինանսական պահանջներ են ներկայացվում, իսկ բուն ընկերություններին՝ գործունեության տեսակների սահմանափակումներ, նախագծի մասնակիցներից շատերը նախընտրում են 2-րդ տարբերակը։ Տեխնոքաղաքում ռեզդիենտ լինելն ապահովելու համար պետք է բացել ռուսական ընկերություն, սակայն դրա սեփականատերերը կարող են լինել ցանկացած երկրի մշտաբնակներ։
Հարցին, թե ընկերությունների առաջ դրվու՞մ են արդյոք աշխատակիցների քանակի, տարեկան շրջանառության կամ աշխատանքի փորձի մինիմալ պահանջներ, «Սկոլկովոյի» ներկայացուցիչը նշեց, որ ավելի շուտ դրվում են մաքսիմալ նպատակներ՝ դուրս գալ գլոբալ շուկաներ եւ նվաճել դրանք։ «Եթե խոսենք կոնկրետ, ապա մենք պիտի հասկանանք, որ նման մասշտաբների խնդիրներ լուծելու համար ստարտապի հեղինակները ոչ միայն նպատակաուղղված գործում են, այլ նաեւ իրոք ի վիճակի են դա անել»,- նշեց Բարշեւսկայան։
Անդրադառնալով թեմատիկ դրամաշնորհների եւ թրենինգների հնարավորությանը՝ նա նշեց, որ թեպետ «Սկոլկովոյի» ենթակառուցվածքները նոր-նոր են ծնվում, սակայն մասնակից ընկերություններն արդեն հիմա էլ մեծ հնարավորություններ են ստանում։ «Մենք բազմաթիվ մրցույթներ ենք կազմակերպում, որոնց արդյունքներով դրամաշնորհներ ենք տրամադրում։ Կազմակերպում ենք տարբեր սեմինարներ, թրենինգներ, դասախոսություններ»,- ասաց նա՝ հավելելով, որ «Սկոլկովոյի» հարկային ռեժիմը էականորեն տարբերվում է համառուսականից։
«Սկոլկովոյի» ընկերությունները ազատվում են ԱԱՀ-ով եկամտահարկից (ներկրումից բացի)։ Այդուհանդերձ ԱԱՀ-ն եւ մաքսային տուրքերը փոխհատուցվում են շինարարական եւ տեխնիկական նպատակներով ներկրվող ապրանքների համար։ Հարկային ռեժիմի մասին մանրամասն՝ այստեղ։
