Հայաստանի Ֆինանսների նախարարության հարկային ծառայությունը մշտական աշխատանք է տանում արդյունավետ հարկահավաքության ուղղությամբ: Այս մասին մայիսի 25-ին խորհրդարանում լրագրողներին հայտարարեց Հայաստանի Ֆինանսների նախարար Գագիկ Խաչատրյանը:

Նրա խոսքով, վերջին շրջանում 4 մլրդ դրամ է ներգրավվել «ԱրմենՏել»-ից, շուրջ 16 մլրդ դրամ՝ «Զանգեզուրի պղնձամոլիբդենային կոմբինատ»-ից:

Գործարար եւ պատգամավոր Սամվել Ալեքսանյանի «Ալեքս Գրիգ» ՍՊԸ-ին, ըստ նախարարի, հարկային ծառայությունը 250 մլն դրամի տուգանք է ներկայացրել (ընթացիկ փոխարժեքով՝ շուրջ 524 հազար դոլար - խմբ.)՝ մանրածախ առեւտրում ՀԴՄ-ների աշխատանքի ռեժիմի անհամապատասխանության համար:

Նշենք, որ «Ալեքս Գրիգ»-ը, «Զանգեզուրի պղնձամոլիբդենային կոմբինատ»-ը եւ  «ԱրմենՏել»-ը, 2014 թվականի արդյունքներով, 3-րդ, 4-րդ եւ 5-րդ տեղերն են զբաղեցրել Հայաստանի խոշոր հարկատուների ցանկում:

Բացի այդ, եթե մեկ տարի առաջ հանրապետության ընկերությունների հարկային վնասը շուրջ 350 մլրդ դրամ է կազմել (ընթացիկ փոխարժեքով՝ շուրջ 733 մլն դոլար - խմբ.), ապա հիմա այն կրճատվել է մինչեւ շուրջ 200 մլրդ-ի:

«Բայց խնդրում եմ հասկանալ. հարկային վարչարարությունն ամենօրյա գործընթաց է: Մենք չենք սպասում, մինչեւ իրավախախտ հայտնվի, որպեսզի 20 մլրդ-ի տուգանք գրենք: Մեր նպատակն է՝ ժամանակին հայտնաբերել պոտենցիալ խախտումն ու այդ մասին տեղեկացնել հարկատուին»,- ընդգծեց նախարարը: