Լոռու մարզի ընդհանուր իրավասության դատարանում շարունակվում է 15-ամյա հանդբոլիստ Դավիթ Հովակիմյանի սպանության գործով քննությունը. մայիսի 25-ին կայացած դատական նիստին կողմերն ուսումնասիրել են գործում առկա ապացույցները: Այս մասին NEWS.am-ին ասաց գործով ամբաստանյալ Կարեն Կունգուրցեւի փաստաբան Արայիկ Պապիկյանը:
«Պաշտպանական կողմը 30-ից ավելի միջնորդություններ է ներկայացրել՝ հիմնավորելով, որ գործում առկա փաստաթղթերի մեծ մասը պետք է ճանաչվի ոչ թույլատրելի, քանի որ ձեռք է բերվել կոպիտ խախտումներով»,- ասաց փաստաբանը:
Նա նշեց, որ խոսքը մասնավորապես այն անչափահաս վկաների հարցաքննություններն են, որոնք ըստ մեղադրանքի՝ «առանցքային» են համարվում:
Դատական հաջորդ նիստը կկայանա հունիսի 5-ին, որի ընթացքում մեղադրող կողմն ու դատարանն իրենց դիրքորոշումը կհայտնեն միջնորդությունների վերաբերյալ:
Հիշեցնենք, որ ըստ մեղադրական եզրակացության՝ Կարեն Կունգուրցեւը 2013թ. հոկտեմբերի 12-ին ժամը 18:00-ի սահմաններում կենցաղային հողի վրա վիճաբանել է եւ ապօրինաբար կյանքից զրկելու` սպանելու դիտավորությամբ դանակով մեկ անգամ հարվածել է Դավիթ Հովակիմյանի կրծքավանդակին` վերջինիս պատճառելով մարմնական վնասվածքներ, սակայն վերջինիս ընկերների` օգնության հասնելուց հետո Կարենը դիմել է փախուստի: Դեպքից անմիջապես հետո Դ. Հովակիմյանը տեղափոխվել է «Վանաձոր ԲԿ» ՓԲԸ, որտեղ ժամը 21:35-ին մահացել է: Կարենին մեղադրանք է առաջադրվել Քրեական օրենսգրքի 34-104-րդ հոդվածի 1-ին մասով: Խափանման միջոց է ընտրվել կալանավորումը: Նշենք, որ Դավիթը Վանաձոր էր մեկնել՝ հանդբոլի Հայաստանի առաջնության եզրափակիչ մրցաշարին մասնակցելու համար:
