Հունաստանի խորհրդարանն արտահերթ նիստում հավանության է արժանացրել վարկատուների առաջարկների շուրջ հուլիսի 5-ին հանրաքվե անցկացնելու որոշումը:
ՏԱՍՍ-ի փոխանցմամբ, 300 պատգամավորներից հանրաքվեի անցկացմանը «կողմ» է քվեարկել 178, «դեմ»՝ 120 օրենսդիր: «Կառավարության առաջարկության համաձայն, հանրաքվեի ընթացքում հույն ժողովուրդը պետք է քվեարկության միջոցով որոշի, կառավարությունն ընդունի, թե՞ մերժի համաձայնագրի նախագիծը, որը ներկայացրել են Եվրահանձնաժողովը, Եվրոպական կենտրոնական բանկն ու Արժույթի միջազգային հիմնադրամը: Փաստաթուղթը կազմված է երկու մասից. «Բարեփոխումներ՝ ընթացիկ ծրագրերն ավարտելու համար» եւ «Պարտքի կայունության նախնական վերլուծություն»,- նշվել է խորհրդարանի նիստի ծրագրում:
Ավելի վաղ հաղորդվում էր, որ եվրոգոտու ֆինանսների նախարարները հունիսի 30-ից հետո հրաժարվել են երկարաձգել Հունաստանին ֆինանսական աջակցության ծրագիրը: Եթե Հունաստանը չստանա ֆինանսական օգնության երկրորդ փաթեթի արգելափակված վերջին տրանշը (7.2 մլրդ եվրո), երկրին դեֆոլտ է սպառնում, ինչից հետո կարող է եվրոգոտուց Հունաստանի դուրս գալու գործընթաց սկսվել: