Բաղրամյան պողոտայում ցուցարարները չպետք է ծածկվի անթափանց պոլիէթիլենային ծածկով: Այս մասին, այսօր՝ հունիսի 30-ին, ցուցարարներին հայտարարել է Երեւանի փոխոստիկանապետ Վալերի Օսիպյանը՝ առավոտյան զննման ժամանակ:
Նա ցուցարարներին հանձնարարել է հավաքել կապույտ պոլիէթիլենային ծածկոցը եւ փոխարինել թափանցիկով, որպեսզի դրսից երեւա:
«Պարոն Օսիպյան, այստեղ ունենք հաց, պանիր, մնացած ամեն ինչ, ինչը արեւի տակ կփչանա»,-հայտարարեցին ցուցարարները:
«Մեկ օրում չի փչանա, հանգիստ եղեք: Եվ արեք այն, ինչ ձեզ ասում է ոստիկանությունը: Դուք առանց այդ էլ դուք խախտում եք հասարակական կարգը, փակել եք քաղաքի կարեւորագույն պողոտաներից մեկը»,-արձագանքեց Օսիպյանը:
Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով:
