2013/2015թթ. Եվրամիության ծրագիրը Հայաստանում օգնել է 17 հայրենադարձների։ Այս մասին հուլիսի 7-ին՝ միգրանտների համար ստեղծված ռեսուրս կենտրոնները ՀՀ աշխատանքի եւ սոցիալական հարցերի նախարարությանը հանձնելու հանդիսավոր արարողության ժամանակ, հայտարարեց People in Need չեխական կազմակերպության հայկական գրասենյակի տնօրեն Ֆիլիպ Հովհաննիսյանը։

Կենտրոնները գործում են 2013թ. հուլիսի 1-ից ԵՄ աջակցությամբ եւ Հայ օգնության միության (Armenian Relief Society) օժանդակությամբ։ 2 տարվա ընթացքում կենտրոնները մասնագիտացված դասընթացներ են կազմակերպել 278 պոտենցիալ հայրենադարձների համար, որոնց 55 տոկոսը աշխատանք է գտել։ Միգրացիոն իրավունքի հարցերով խորհրդատվություն է ստացել 8 հազար մարդ։

Կենտրոնները բիզնես հմտությունների դասընթացներ են կազմակերպել։ Ստացած դիմումներից ընտրվել են 17-ը, որոնց համար դրամաշնորհներ են հատկացրել։ «Դրանք հատկացվել են ոչ թե կանխիկ դրամով, այլ ապագա բիզնեսի համար անհրաժեշտ գույքի տեսքով։ Ընդ որում, այդ  գույքը միայն գտնվում է նրանց ղեկավարության ներքո, բայց նրանց չի պատկանում։ Մոնիթորինգի արդյունքում կորոշենք, հանձնել արդյոք նրանց այդ գույքը վերջնականապես, թե ոչ»,- NEWS.am-ի թղթակցին պարզաբանեց Ֆիլիպ Հովհաննիսյանը։

Ստեղծված 17 փոքր ձեռնարկություններում աշխատում են 60 մարդ։ Հիմնականում դա ընտանեկան բիզնես է, բայց կան նաեւ վարձու աշխատակիցներ։