Սոցիալ դեմոկրատական Հնչակյան Կուսակցության Կենտրոնական Վարչությունն իր լիագումար նիստում որոշել է, որ այլեւս չի համագործակցելու ՀԱԿ-ի հետ ինչպես Հայաստանում, այնպես էլ Հայաստանից դուրս:
Նրանց հայտարարության մեջ մասնավորապես ասվում է. «Ծանոթանալով ՍԴՀԿ Հայաստանի կազմակերպության 7-րդ Համագումարից հետո (16 դեկտեմբեր 2009թ.) իրականացրած աշխատանքներին, Կենտրոնական Վարչությունը միաձայն ողջունում է նրա կողմից ինքնուրույն գործելու քաղաքական ուղեգծի ընտրությունը: Հայ իրականության առաջին քաղաքական Կուսակցությունը չի կարող լինել որեւէ այլ քաղաքական միավորի կցորդ: Կենտրոնական Վարչությունը առավել եւս մերժում է ՀԱԿ-ի ուղղակի պառակտողական միջամտությունը Կուսակցության ներքին հարցերին:
Ուստի, անհնարին է գտնում ՀԱԿ-ի հետ հետագա համագործակցությունը ինչպես Հայաստանում, այնպես էլ Հայաստանից դուրս:
Կենտրոնական Վարչությունը շեշտում է ՍԴՀԿ-ի համար կարեւորագույն հայ-թրքական եւ Արցախի հարցի կարգավորման խնդիրներում իշխանության կողմից հարուցված գործողությունների եւ այդ գործընթացը սատարող քաղաքական ուժերի հետ առկա խորը անհամատեղելիությունը Կուսակցության ծրագրի հետ:
Ողջունելի է նաեւ ՍԴՀԿ Հայաստանի կազմակերպության այն համոզմունքը, ըստ որի, հայրենիքը ամայացնող եւ քայքայող ճգնաժամից կարող է դուրս բերել միայն լիբերալ համակարգից անցումը սոցիալ-դեմոկրատականի: Անձերի փոփոխումը համակարգի պահպանման պարագայում որեւէ դրական արդյունք տալ չի կարող, ինչն անվիճելիորեն հաստատում է Հայաստանի վերջին 20 տարիների պատմությունը:
ՍԴՀԿ Կենտրոնական Վարչությունը մեկ անգամ եւս իր զորակցությունն է հայտնում Հայաստանի Հնչակյան կազմակերպությանը, ողջ հայ ժողովրդին հավաստիացնելով, որ իր հավաքական ներուժը դնելու է հանուն Արցախի ամբողջական անկախության ճանաչման, Հայ Դատի արդար լուծման, համահայկական միասնության ստեղծման եւ մայր Հայրենիքը ընկերային արդարության, օրինականության, հավասարության եւ ազատության երկիր դարձնելու կարեւորագույն ազգային խնդիրների իրագործման համար»:
