Բաքվի ծանր հանցագործությունների դատարանում սկսվել է հայտնի իրավապաշտպան Լեյլա Յունուսի եւ նրա ամուսնու՝ Արիֆ Յունուսի գործի դատաքննությունը, որոնք մեղադրվում են խոշոր չափերի խաբեբայության մեջ:
Տեղի լրատվամիջոցների տվյալներով, նիստին թույլ են տվել սահմանափակ թվով դիտորդների, թեեւ ներսում ազատ տեղեր են եղել: Իրավապաշտպանները դա համարել են դատարանի բաց լինելու սկզբունքի խախտում, հաղորդում է BBC-ի ռուսական ծառայությունը:
Դատական նիստի ժամանակ դատավորը մերժել է ամբաստանյալների խափանման միջոց կալանքը փոխելու վերաբերյալ միջնորդությունը: Ամուիսնները կմնան կալանքի տակ:
Քննության վարկածով, Լեյլա Յունուսը, լինելով «Խաղաղության եւ ժողովրդավարության ինտիտուտի» հիմնադիր եւ տնօրեն, «հայկական կենտրոնի հետ համատեղ նախագծեր իրականացնելուանվան տակ միջազգային կազմակերպություններից դրամաշնորհներ է ստացել»:
Այդ միջոցները, Յունուսը ամուսնու միջոցով իբր «օգտագործել է այն մարդկանց նյութական վիճակը բարելավելու նպատակով, որոնց նա փորձել է հավաքագրել լրտեսական գործունեության համար»: Ինքը՝ Լեյլա Յունուսը ամբողջությամբ հերքում է մեղադրանքը:
Բացի տնտեսական հոդվածներից, Յունուս ամուսիններին մեղադրում են պետական դավաճանության մեջ, սակայն այդ գործը առանձնացվել է: Միայն տնտեսական հոդվածներով նրանց սպառնում է մինչեւ 21 տարվա ազատազրկում:
Հիշեցնենք, որ նախորդ շաբաթ Բաքվում սկսվել է լրագրողուհի Հադիջա Իսմայլովայի դատավարությունը, որը հայտնի է իշխանության բարձր էշելոնների ներկայացուցիչների նկատմամբ իր լրագրողական հետաքննություններով:
