Սյունիքի մարզպետ Սուրիկ Խաչատրյանի որդու՝ Տիգրան Խաչատրյանի խափանման միջոց ընտրելու վերաբերյալ միջնորդության քննությունը 2 ժամով հետաձգվել է: Այս մասին NEWS.am-ի թղթակցին ասաց Տիգրան Խաչատրյանի փաստաբան Արմեն Մելքոնյանը:
«Մենք միջնորդություն ներկայացրինք, որ ունենք համապատասխան փաստաթղթեր, որոնք վկայում են իմ պաշտպանյալի անմեղությունը: Դատարանից խնդրեցինք մինչեւ վաղը ժամանակ տալ փաստաթղթերը ներկայացնելու համար: Դատարանը, սակայն, մերժեց եւ մեզ երկու ժամ ժամանակ տվեց. խափանման միջոցի հարցը կքննարկվի ժամը 17:20-ին»,- ասաց փաստաբանը:
Արմեն Մելքոնյանի խոսքով՝ ակնհայտ միտում կա դատարանի որոշման մեջ. փաստաբանը համոզված է, որ «ինչ-որ մեկին պետք է հրատապ կալանավորել» Տիգրան Խաչատրյանին:
Նշենք, որ այսօր՝ հուլիսի 27-ին, Տիգրան Խաչատրյանին մեղադրանք է առաջադրվել Քրեական օրենսգրքի 112-րդ հոդվածի 1-ին մասով:
Ավելի վաղ Քննչական կոմիտեն հաղորդել էր, որ 2015թ. մայիսի 2-ին՝ ժամը 17:00-ի սահմաններում, տեղի է ունեցել վիճաբանություն՝ դրանից ժամեր առաջ Գորիս քաղաքում տեղի ունեցած ավտովթարի կապակցությամբ, որի հետևանքով վնասվել էր Մուշեղ Զաքարյանի վարած ավտոմեքենայի կողային հայելին։
Վիճաբանության ժամանակ մի խումբ անձանց կողմից բռնություն է գործադրվել Մուշեղ եւ Հարություն Զաքարյանների նկատմամբ, որի հետևանքով Մ.Զաքարյանին պատճառվել է միջին ծանրության, իսկ Հ.Զաքարյանին` ծանր մարմնական վնաս:
Կատարված քննչական գործողությունների արդյունքում նախկինում 6 անձ ներգրավվել է որպես մեղադրյալ՝ Մ.Զաքարյանին ծեծելու, միջին ծանրության վնաս պատճառելու համար:
