Սոցիալական ցանցերում ֆլեշմոբ են սկսել՝ ի պաշտպանություն ծեծված ֆրանսուհու: Նախնական տեղեկություններով, կինը զայրացած մահմեդական կանանց խմբի զոհ է դարձել:
Հարձակումը տեղի է ունեցել Ռեյմսում: Տուժածը քաղաքի այգիներից մեկում երկու ընկերների հետ արեւահարվելիս է եղել, երբ նրան է մոտեցել աղջիկների մի խումբ՝ փորձելով ամոթանք տալ բիկինիով լինելու համար: Արեւային լոգանքների սիրահար ֆրանսուհին կոպիտ պատասխան է տվել, ինչից հետո մահմեդականները բռունցքներով հարձակվել են նրա վրա:
НТВ-ի փոխանցմամբ, բարեբախտաբար, ականատեսները միջամտել են, ինչի արդյունքում բիկինիով կինը միայն թեթեւ վնասվածքներ է ստացել: Միջադեպը, սակայն, հասարակական լայն արձագանքի է արժանացել: Տասնյակ ֆրանսուհիներ լողազգեստներով ցուցադրական ակցիա են անցկացրել այգում, որտեղ տեղի է ունեցել հարձակումը, իսկ հետո սոցիալական ցանցերում #jeportemonmaillotauparc («ես զբոսայգում լողազգեստ եմ կրում») հեշթեգը թողարկել:
Ըստ The Independent-ի, իշխանությունները չեն շտապում պաշտոնական հայտարարություն անել այս առիթով: Հայտնի է, որ միջադեպից հետո 5 աղջիկներ ձերբակալվել են: Նրանց անձի մասին ոչինչ չի հաղորդվում: Նշվում է, որ բոլորն էլ մահմեդականներով բնակեցված թաղամասերից մեկի բնակիչներ են:
