Փաստաբան Տիգրան Եգորյանը համոզված է, որ Հայաստանում Սահմանադրական փոփոխություններ արվում են իշխանությունը չկորցնելու համար։ Այսօր՝ օգոստոսի չորսին, լրագրողների հետ հանդիպմանը փաստաբանը նշեց, որ հենց Սահմանադրական բարեփոխումների մասնագիտական հանձնաժողովը բացահայտեց այդ նպատակը։
«Հանձնաժողովը ոչ թե տապալեց բարեփոխումների հիմնավորման հարցը, այլեւ այս ամբողջ ընթացքում բացահայտեց իրական նպատակը։ Իրականում փոփոխությունների հետեւում ընկած է մի նպատակ, որից իշխանությունը հստակորեն չի շեղվում։ Գերնպատակն իշխանությունը պահելն է»,- ասաց Տիգրան Եգորյանը։
Փաստաբանի խոսքով՝ այս տարիներին Սահմանադրության փոփոխություններ էլի եղել են, որոնք, սակայն, որեւէ բան չեն փոխել հասարակության կյանքում։
«Հայաստանում իշխանությունները լեգիտիմ չեն, ընտրությունների միջոցով Հայաստանում անհնար է իշխանության փոփոխությունը։ Հետեւաբար, իշխանությունները չունեն լեգիտիմություն՝ Սահմանադրական փոփոխությունների հարց բարձրացնելու։ Եթե իշխանությունն արդյունավետ կառավարում չի իրականացնում, ապա առաջին հերթին պետք է փոխվի իշխանությունը, ոչ թե Սահմանադրությունը»,- ավելացրեց նա։
Նշենք, որ հուլիսի 15-ին հրապարակվել են Սահմանադրության նոր նախագծի 1-7-րդ գլուխները։ Նոր նախագծով առաջարկվում է անցում կատարել կառավարման խորհրդարանական համակարգին։
