![](img/news/28/02/80/default.jpg)
Բուսաբանական այգում եւ Ծիծեռնակաբերդում այս տարվա հուլիսի բռնկված հրդեհները տեղի են ունեցել ոռոգման պակասի պատճառով: Այս մասին այսօր՝ օգոստոսի 5-ին, լրագրողների հետ զրույցում հայտարարեց բնապահպան Կարինե Դանիելյանը:
Ըստ Կարինե Դանիելյանի Երեւանը խոցելի է նաեւ սելավների ժամանակ, իսկ բնապահպանական տեսանկյունից ամենախոցելին Կենտրոն համայնքն է:
«Դա այդպես է եղել նաեւ Սովետական տարիներին: Կենտրոնը այլեւս կառուցապատել, խտացնել չի կարելի: Պետք է պատմամշակութային արժեքները պահպանել,կանաչապատել»,- նշեց Կարինե Դանիելյանը, ում կարծիքով Կենտրոն համայնքը այսօր բնապահպանության առումով խոցել է, քանի որ յուրաքանչյուր «օլիգարխ» ուզում է Կենտրոն համայնքում տարածք ունենալ:
Կարինե Դանիելյանը նաեւ նշեց, որ Հայաստանում էկոլոգիական ամենամեծ խնդիրներ ունեցող քաղաքը Քաջարանն է: Նրա խոսքով, օդը աղտոտված է նաեւ Ալավերդի եւ Կապան քաղաքներում:
Համեմատելով Հայաստանն Անդրկովկայան մյուս երկրներիր հետ՝ նա նշեց, որ Ադրբեջանում էկոլոգիական պրոբլեմներն ավելի շատ են, իսկ Վրաստանում՝ ավելի քիչ:
NEWS.am-ի թղթակցի հարցին, թե ո՞ր երկրներն են արդյունավետ պայքարում էկոլոգիական խնդիրների դեմ՝ բնապահպանը պատասխանեց.«Կարող եմ առանձնացնել Ճապոնիան եւ Հյուսիսային Եվրոպայի որոշ քաղաքներ, որոնք հսկայական աշխատանք են տանում եւ օդի եւ ջրի աղտոտվածության դեմ»: