Սամցխե Ջավախքի Տաբածղուր գյուղում օգոստոսի 11-ին տեղի ունեցած ընդհարումից հետո արդեն 2 օր է՝ իրավիճակը խաղաղ է: Այս մասին NEWS.am-ի թղթակցին հայտնեցին համայնքի բնակիչները:
«Մեր բարձրացրած աղմուկը ոնց որ թե արդյունք տվեց, հանգստացան բոլորը, հիմա խաղաղ է: Ոչ մի լարվածություն չկա»,- ասացին գյուղացիները:
Նրանք հայտնեցին նաեւ, որ օգոստոսի 11-ին առգրավված նավակներն արդեն վերադարձրել են իրենց:
Հիշեցնենք, որ օգոստոսի 11-ին ոստիկաններն ու բնապահպանության նախարարության աշխատակիցները գյուղի բնակիչներին արգելել էին ձուկ որսալ լճից, քանի որ այնտեղից ձկնորսություն կատարելու իրավունք ունի միայն ԱԺ ՀՀԿ-ական պատգամավոր Վարդան Այվազյանին պատկանող ընկերությունը: Ոստիկանների եւ գյուղացիների միջեւ ընդհարում էր տեղի ունեցել, մի քանի գյուղացու փորձել էին բերման ենթարկել, սակայն գյուղացիները փակել էին ճանապարհը եւ թույլ չէին տվել:
Նշենք, որ Վրաստանի կառավարությունը Վարդան Այվազյանի ընկերությանը լիճը տնօրինելու 20 տարվա իրավունք է տվել:
