Ուկրաինայի նախագահ Պյոտր Պորոշենկոն Եվրահանձնաժողովի նախագահ Ժան Կլոդ Յունկերի հետ Բելգիայում համատեղ ասուլիսի ժամանակ ԵՄ-ին կոչ է արել երկարաձգել հակառուսական պատժամիջոցները։ Այս մասին Twitter-ում գրել է Ուկրաինայի նախագահի մամուլի խոսնակ Սվյատոսլավ Ցեգոլկոն, փոխանցում է ՈՒՆՆ-ը։
«Խաղաղության գործընթացը պետք է լինի իրական եւ ոչ թե ֆեյք։ Ռուսաստանը չի կատարում Մինսկի համաձայնագրերը։ Նախագահ Պորոշենկոն ԵՄ-ին կոչ է արել երկարաձգել ՌԴ-ի դեմ գործող պատժամիջոցները»,- հայտնել է Ցեգոլկոն։
Պորոշենկոն նաեւ կոչ է արել մինչեւ սեպտեմբերի 1-ը անհապաղ դադարեցնել Դոնբասում հրաձգությունը։ «Ես չեմ հասկանում, թե ինչու պետք է մենք մեկ շաբաթ սպասենք հրադադարի հաստատմանը»,- մեջբերել է խոսնակը Պորոշենկոյի խոսքը։
Ավելի վաղ ԵԱՀԿ ներկայացուցիչ Մ. Սայդիկը նշել էր, որ մարդասիրական հարցերով ենթախմբի բոլոր մասնակիցները համաձայնության են եկել անել ամեն բան դպրոցականների անվտանգությունն ապահովելու համար, հատկապես նրանց համար, ովքեր դպրոց են գնում Դոնբասում՝ շփման գծից ոչ հեռու։ Նրանք համաձայնության են եկել հրադադար հաստատել սեպտեմբերի 1-ից։
Ուկրաինայի նախագահը նաեւ նշել է, որ Մինսկ-3 չի լինելու։ «Ուզում եմ առանձին շեշտել, որ գոյություն չունի եւ չի ունենա ոչ մի երրորդ Մինսկ»,- նշել է նա։
