Ռուս գործատուներին առաջարկել են վճարել Ռուսաստանի տարածքում հանգստացող աշխատակիցների հանգստի համար այն պայմանով, որ մեկ մարդուն բաժին հասնող ծախսը չպետք է գերազանցի 50 հազար ռուբլին։ Հարկային օրենսգրքում փոփոխությունների նախագիծը ներկայացվել է Պետդումա, հայտնում է «Ռոսիյսկայա գազետա»-ն։
Նախաձեռնության հեղինակներն են Դաշնային խորհրդի՝ սոցիալական քաղաքականության հարցերով հանձնաժողովի նախագահ եւ փոխնախագահ Վալերի Ռյազանցեւն ու Իգոր Չերնիշեւը։
«Շատ ընտանիքների համար, հատկապես նրանց, ովքեր մեծ եկամուտ չունեն, դա կարող է արձակուրդը ընտանիքի հետ անցկացնելու հնարավորություն դառնալ, շփվել բնության հետ եւ ծանոթանալ մեր երկրի պատմական ժառանգությանը»,- ասված է օրինագծին կից նամակում։
ՌԴ զբոսաշրջության դաշնային գործակալության տեղեկություններով՝ այս տարի արտասահմանում հանգստանալու մեկնած զբոսաշրջիկների թիվը պակասել է ռուբլու անկման պատճառով։
