ԱՄՆ Նյու Մեքսիկոյի նահանգի դատախազությունը նահանգի պետքարտուղար Դիանա Դյուրանին մեղադրանք է ներկայացրել դրամական միջոցների յուրացման, խարդախության եւ փող լվանալու մեջ։ AP գործակալության տվյալներով՝ Դյուրանին նաեւ մեղադրում են հանրային գրառումները կեղծելու եւ հանցավոր դավադրության մասնակցելու մեջ, գրում է «ՌԻԱ Նովոստի»-ն։
«Դիանա Ջ. Դյուրանը չարաշահել է իր լիազորությունները եւ օգտագործել պետական ծառայողի կարգավիճակը, աշխատակիցներին ու նահանգի պետքարտուղարի պաշտոնը անձնական շահ հետապնդելու նպատակով»,- ասված է դատական հայցում, որը Սանտա Ֆե քաղաքի շրջանային դատարան է ներկայացրել գլխավոր դատախազի գրասենյակը։
Դատական հայցի համաձայն՝ դատախազությունը հետաքննել է Դյուրանի անձնական եւ նրա հսկողության տակ գտնվող ընտրական հանձնաժողովի հաշվեհամարների վրա եղած խոշոր դրամական միջոցների աղբյուրները։
