Թաիլանդում իրավապահ մարմինները օգոստոսի 29-ին Թաիլանդում ձերբակալել են օգոստոսի 17-ին Բանգկոկում 20 մարդու կյանք խլած պայթյուն կազմակերպելու մեջ կասկածվողին:
Կասկածյալին ձերբակալել են Թաիլանդի մայրաքաղաքի հյուսիսում գտնվող բնակարանի խուզարկման ժամանակ: Իրավապահներին նաեւ հաջողվել է հայտնաբերել նյութեր, որոնք կարող են օգտագործվել պայթուցիկ սարքեր պատրաստելու նպատակով, հայտնում է «ՏԱՍՍ»-ը:
Օգոստոսի 21-ին ազգային ոստիկանության ներկայացուցիչ Սոմյոտ Պումպանմուանգը հայտարարել է, որ Բանգկոկում ակաբեկչության կազմակերպիչները Թաիլանդի կառավարությունը վարկաբեկելու նպատակ էին հետապնդում: Նա նշել է, որ Բանգկոկի պայթյունի կազմակերպիչները որեւէ միջազգային ահաբեկչական կազմակերպության հետ առնչություն չունեն:
Պայթյունի հետեւանքով Բանգկոկի կենտրոնում օգոստոսի 17-ին զոհվել է 20 մարդ, 125-ը տուժել է: Տուժածների մեծ մասը օտարերկրյա զբոսաշրջիկներ են: