![](img/news/28/38/93/default.jpg)
Հայաստանն ու Չինաստանը պատրաստվում են առեւտրային ներկայացուցչություններ բացել։ Համապատասխան համաձայնագրի նախագիծը հավանություն է ստացել օգոստոսի 31-ին կայացած Կառավարության նիստում։
Ինչպես նիստում հայտարարեց ՀՀ էկոնոմիկայի նախարար Կարեն Ճշմարիտյանը, համաձայնագիրը թույլ կտա առավել օպերատիվ տեղեկություն ստանալ չինական շուկայի առաջարկի եւ պահանջարկի մասին, ինչը նշանակում է, որ երկկողմ տնտեսական կապերը կակտիվանան եւ կնպաստեն հայկական ապրանքների արտահանմանը։
Նշենք, որ Ազգային վիճակագրական ծառայության տվյալներով՝ 2015թ. հունվար-հունիսին Չինաստանը դարձել է Հայաստանի խոշորագույն արտահանման շուկան (համախառն արտահանման 92,1 մլն դոլարը կամ 13.3 տոկոսը)։ Իհարկե դա հիմնականում պղնձի խտանյութի հաշվին, որն առաջ մեծ քանակությամբ արտահանվում էր Բուլղարիա։ Իսկ Հայաստանից պատրաստի արտադրանքի արտահանման խոշորագույն շուկան շարունակում է մնալ Ռուսաստանը։