Հայաստանի ոստիկանությունը քրեական գործ է հարուցել օգոստոսի 19-ին «Գեղամա» ռեստորանում 41 մարդու թունավորման փաստով:

Ինչպես NEWS.am-ին հայտնել են Հայաստանի ոստիկանության մամուլի ծառայությունից, թունավորման փաստով քրեական գործ է հարուցվել Հայաստանի քր.օր.-ի 277 հոդվածի հատկանիշներով, որը պատասխանատվություն է ենթադրում սանիտարա-համաճարակային նորմերի խախտման համար:

Հիշեցնենք, որ Հայաստանի առողջապահության նախարարության պետական հիգիենիկ եւ հակահամաճարակային տեսչությունը ստուգումներ էր անցկացրել եւ պարզել, որ «Գեղամա» ռեստորանում 41 մարդու թունավորման պատճառը ռեստորանի աշխատանքային կազմի անպարտաճանաչ աշխատանքն է:

Լաբորատոր հետազոտությունների արդյունքում մի շարք նմուշներից անջատվել է ոսկեգույն ստաֆիլակոկ եւ էնտերոպաթոգեն աղիքային ցուպիկ, ինչով եւ պայմանավորված էր սննդային թունավորումը:

NEWS.am-ն ավելի վաղ հայտնել էր, որ օգոստոսի 19-ին՝ ժամը 21.30-ի սահմաններում Երեւանի Հրազդանի կիրճում գտնվող «Գեղամա» ռեստորանից սննդային թունավորման նախանշաններով հիվանդանոց են տեղափոխվել 41 քաղաքացի. 22-ը` «Արմենիա», 8-ը` «Նորք», 7-ը` «Էրեբունի», 1-ը` «Մուրացան» բժշկական կենտրոններ եւ 2-ը` 3-րդ հիվանդանոց: