Ադրբեջանի «Մուսավաթ» կուսակցությունը կարող է վերանայել առաջիկա խորհրդարանական ընտրություններում իր մասնակցության հարցը։ Ինչպես գրում է contact.az-ը, այս մասին հայտնել է «Մուսավաթ» կուսակցության նախագահ Արիֆ Հաջիլին։
Նրա խոսքով՝ «Մուսավաթ» կուսակցության անունից առաջադրված ավելի քան 70 թեկնածուներից այսօրվա դրությամբ գրանցվել է ընդամենը 12-ը։ Եվս 12 հեղինակավոր մուսավաթականների դիմումները մերժվել են։ Հաջիլիի խոսքով՝ մինչ այս պահը չի գրանցվել ոչ մի ընդդիմադիր կին պատգամավորական թեկնածու։ Հաջիլին նշել է, որ ստորագրահավաքների ժամանակ «Մուսավաթի» ակտիվիստների նկատմամբ ճնշումներ են գործադրվել։
Ինչպես պնդում է Արիֆ Հաջիլին, նախընտրական մթնոլորտը, գործող օրենսդրությունը թույլ չեն տալիս ժողովրդավարական ընտրություններ անցկացնել։ «Երկրում ասես թե ընտրություններ չկան։ 8 համազգային հեռուստաալիքներից ոչ մեկը ընտրությունների մասին հաղորդում չի պատրաստում։ Հաղորդումներ չկան անգամ իշխող կուսակցության մասին։ Բոլոր ընտրական հանձնաժողովները գտնվում են իշխանության հսկողության տակ, չկա անկախ լրատվամիջոց, չի ապահովվում հավաքների ազատությունը»,- նշել է Հաջիլին։
Միաժամանակ, «Մուսավաթը» ընտրություններին մասնակցելու հարցը դեռ պետք է քննարկի։ Այդ որոշումը կկայացվի հոկտեմբերի 10-ին՝ կուսակցության նիստի ժամանակ։