ԼՂՀ-ում մայիսի 8-ին հրազենային վիրավորումից մահացած ժամկետային զինծառայող, Հայաստանի փոխոստիկանապետ Անուբաղ Համբարյանի ազգական Հարություն Համբարյանի հայրը որդու մահվանից 5 ամիս անց չի էլ պատկերացնում, թե ինչը կարող էր որդու մահվան պատճառ հանդիսանալ: Այս մասին NEWS.am-ի հետ զրույցում ասաց մահացած զինծառայողի հայրը՝ Հրայր Համբարյանը՝ նշելով, որ որդու գործով նախաքննությունը դեռ շարունակվում է:
«Մտքովս հազար բան է անցնում, բայց ինչ իմանամ՝ ինչ է իրականում եղել, ոչ մեկն էլ ճիշտը չի ասում: Իմ որդին ոչ մի բանի խառնվող չէր. ոչ ինքն էր ուրիշի գործերին խառնվում, ոչ էլ ուզում էր՝ ուրիշն իր գործերին խառնվեր: Կոնֆլիկտային բնավորություն չուներ, շատ հանգիստ էր, իր հարցերն ինքնուրույն էր լուծում, ոչ մեկին չէր անհանգստացնի, չգիտենք՝ ինչ ա եղել իրար մեջ, որ նման դեպք է պատահել»,- ասաց նա:
Հարություն Համբարյանի հայրը հերքում է ինքնասպանության վարկածը՝ ասելով, որ իր որդին երբեք նման քայլի չէր դիմի: Նա պնդում է, որ իրենք վճռական են տրամադրված եւ ամեն ինչ անելու են, որ որդու մահվան դեպքով ճշմարտությունը պարզվի:
«Գիտենք՝ նման դեպքերում ինչպես է լինում, բայց մենք մինչեւ վերջ պայքարելու ենք ճշմարտությունը պարզելու համար»,- ասաց մահացած զինծառայողի հայրը:
Նշենք, որ նախաքննությամբ ձեռնարկված քննչական գործողությունների արդյունքում պարզվել է, նույն զորամասի ավագ հրաձիգ-զենիթահար, շարքային որ Դ. Հարությունյանը, խախտելով զինծառայողների փոխհարաբերությունների կանոնագրքային կանոնները, իր թվացյալ գերակայությունն ընդգծելու շարժառիթներով, վիրավորել եւ բռնություն է գործադրել զինծառայող Հ. Համբարյանի նկատմամբ։
Դեպքի առթիվ Զինվորական քննչական գլխավոր վարչության երրորդ կայազորային քննչական բաժնում մայիսի 8-ին հարուցվել է քրեական գործ՝ ՀՀ քրեական օրենսգրքի 110-րդ հոդվածի 1-ին մասով, այն է՝ սպառնալիքի, դաժան վերաբերմունքի կամ անձնական արժանապատվությունը պարբերաբար նվաստացնելու ճանապարհով անձին անուղղակի դիտավորությամբ կամ անզգուշությամբ ինքնասպանության կամ ինքնասպանության փորձի հասցնել:
Դ. Հարությունյանին մեղադրանք է առաջադրվել ՀՀ քրեական օրենսգրքի 359-րդ հոդվածի 1-ին մասովեւ 360-րդ հոդվածի 1-ին մասով: Զինդատախազության խափանման միջոց կալանք ընտրելու միջնորդությունը նախ մերժել է Սյունիքի մարզի ընդհանուր իրավասության դատարանը, ապա Վերաքննիչ քրեական դատարանը եւ մեղադրվող զինծառայողը շարունակում է իր զինվորական ծառայությունը նույն զորամասում:
Ավելի վաղ ԼՂՀ ՊԲ մամուլի ծառայությունը հայտնել էր, որ 2015 թվականի մայիսի 8-ին՝ ժամը 15:15-ի սահմաններում, ՊԲ N զորամասի ժամկետային զինծառայող, շարքային Հարություն Հրայրի Համբարյանը, ըստ նախնական տվյալների, իրեն ամրակցված ԱԿՄՍ տեսակի ինքնաձիգից իր գլխի ճակատային հատվածում արձակված կրակոցի հետևանքով ստացած հրազենային վիրավորումից տեղում մահացել է: