![](img/news/28/98/96/default.jpg)
Քալիֆորնիայում ռեկորդային անտառային հրդեհը, որի հետեւանքով չորս մարդ էր մահացել, նույնքան էլ մարմնական վնասվածքներ էին ստացել, վերջնականապես մարվել է։ Այդ մասին հայտնել են տեղական իշխանությունները։ Սան Ֆրանցիսկոյից ոչ հեռու բռնկված հրդեհը մոլեգնում էր գրեթե մեկ ամիս։
Valley Fire անունը ստացած հրդեհը ոչնչացրել էր ավելի քան 2 հազար շինություններ։ Կրակից տուժել էին ոչ միայն Նապա եւ Սոնոմա քաունթիների անտառները, այլեւ հռչակավոր խաղողի այգիները, որոնք գտնվում են Սան Ֆրանցիսկոյից 110 կմ դեպի հյուսիս։
Հրշեջները հայտարարում են, որ այս հրդեհը դարձել է ամենախոշորներից մեկը Քաիֆորնիայի ողջ պատմության ընթացքում։ Տեղական իշխանությունները հարկադրված են եղել տարհանել 20 հազարից ավելի մարդու։ Զոհված չորս անձանցից մեկը հաշմանդամություն ունեցող մի կին էր, որը չէր կարողացել լքել իր տունը եւ մնացել էր կրակի թակարդի մեջ։ Բոլոր վիրավորները հրշեջներ են, որոնք մասնակցում էին հրդեհաշիջման աշխատանքներին։
Քալիֆորնիայում հրդեհների ընթացիկ սեզոնը հատկապես ինտենսիվ է եղել, նահանգն արդեն չորս տարի պայքարում է կործանարար երաշտի դեմ։ Ծառերն այնքան չոր են, որ անգամ մեկ կայծից բոցավառվում են։